Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Masjid uchun yig’ilgan mablag’ni qanday ishlatish mas’ul shaxsning o’z zimmasidagi omonatdir. Agar u odamlar bergan pullarni halol yo’l bilan, belgilangan maqsadda ishlatsa, bu yaxshi amaldir. Ammo masjid nomidan pul yig’ib, uni boshqa maqsadlarga yoki shaxsiy manfaatiga sarflasa, buning javobini qiyomat kuni albatta o’zi beradi.

Siz esa ehsonni Alloh uchun bergan bo’lsangiz, niyatingizga yarasha ajringizni olasiz. Mablag’ni noto’g’ri ishlatgan odamning gunohi sizga yuklanmaydi.

Bu holat jamoat namozini tark qilishga sabab bo’lmasligi kerak. Masjidga boring va jamoat bilan namozingizni o’qing. Bir kishining gunohi yoki xatosi sizni jamoat namozidan mahrum qilmasin.

Agar har kimning biror kamchiligi sababli uning orqasida namoz o’qilmaydigan bo’lsa, unda deyarli hech kimning orqasida namoz o’qib bo’lmay qolardi. Chunki hech bir inson farishta emas, har bir kishining o’ziga yarasha kamchiligi bo’lishi mumkin.

Shuning uchun, imom namozni to’g’ri o’qiyotgan bo’lsa, siz ham jamoat bilan namozingizni ado eting va ajringizni oling.

Ammo agar kimdir odamlarning molini nohaq yo’l bilan yegan bo’lsa, buning hisob-kitobini qiyomat kuni o’zi beradi.

Vallohu a’lam.