Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Namozda eng muhimi — vaqt kirgan bo‘lishidir. Agar taqvim to‘g‘ri bo‘lsa va peshin vaqti haqiqatan ham soat 12:30 da kirgan bo‘lsa, namozni o‘qiyverish mumkin.

Lekin jamoat namozidan oldin o‘qimaslik kerak, degan ulamolarning gapini to‘g‘ri tushunish kerak. Bu hukm jamoat namoziga borishi vojib bo‘lgan kishilar haqidadir.

Masalan, bir odam jamoatga borishni niyat qilgan, lekin vaqtincha uzri chiqib qolgan. Balki o‘sha uzri ketib, jamoatga yetib olishi mumkin. Shuning uchun bunday odamga biroz kutish tavsiya qilinadi.

Ammo ayol kishi yoki kasal bo‘lib jamoatga bora olmaydigan odam uchun bu holat boshqacha. U baribir jamoatga chiqmaydi. Shuning uchun namoz vaqti kirishi bilan namozini o‘qib olsa, hech qanday zarari yo‘q.

Albatta, odob yuzasidan, masjidda azon aytilib, jamoat namozi o‘qib bo‘lingach o‘qishni afzal ko‘rish mumkin. Chunki bu Allohning shaoirlarini ulug‘lash belgilaridan biridir.

Lekin namoz vaqti kirgach, ayniqsa ayol kishi yoki jamoatga bora olmaydigan odam namozini darhol o‘qib olsa, buning hech qanday zarari yo‘q.

Vallohu a’lam.