Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Albatta, namozlaringizni sunnatlari bilan to‘liq o‘qishga harakat qiling.

Siz “musofir bo‘lib yuribman” desangiz ham, uzoq vaqt bir joyda yashab, o‘sha yerda muqim yashayotgan kishidek hayot kechirayotgan bo‘lsangiz, namoz masalasida muqim kishining hukmida bo‘lasiz. Shuning uchun namozlarni to‘liq o‘qiysiz.

“Faqat farzlarini o‘qisam bo‘ladimi?” degan masalaga kelsak, sunnat namozlarining katta ahamiyati bor. Chunki sunnat va nafl namozlar farz namozlarimizdagi kamchiliklarni to‘ldirishga sabab bo‘ladi. Rasululloh ﷺ bu namozlarni bizga bejiz o‘rgatmaganlar.

Rasululloh ﷺ bir kecha-kunduzda o‘n ikki rak’at sunnat namozini muntazam o‘qigan kishiga Jannatda bir uy qurilishi haqida xabar berganlar. Bomdodning ikki rak’at sunnati va boshqa ravotib sunnatlarni qo‘shganda, jami o‘n ikki rak’at bo‘ladi.

Shunday ekan, nega bu ulkan ajrdan mahrum bo‘lishimiz kerak?

Qiyomat kuni banda birinchi bo‘lib namozi haqida hisob-kitob qilinadi. Agar farz namozlarida kamchilik bo‘lsa, uning nafl namozlariga qaraladi va Allohning izni bilan farzlardagi kamchiliklar shu nafl namozlari bilan to‘ldiriladi.

Demak, sunnat va nafl namozlari aynan shunday kunda insonga juda katta foyda beradi. Shuning uchun oxiratini va o‘zining najotini o‘ylagan aqlli mo‘min sunnat namozlariga ham e’tiborli bo‘ladi.

Imkon qadar namozlaringizni sunnatlari bilan birga to‘liq ado etishga odatlaning.

Vallohu a’lam.