Hadisda kelgan «الْحَمْوُ الْمَوْتُ» (“Erning qarindoshlari o’limdir”) degan iboraning ma’nosi shuki, bu yerda erning aka-ukalari, amakivachchalari va boshqa nomahram erkak qarindoshlari nazarda tutilgan.

“O’lim” deyilishining ma’nosi — bu fitna va xavfning nihoyatda kattaligini bildiradi. Ya’ni bunday yaqin qarindoshlar bilan ehtiyotsizlik qilish, yolg’iz qolish yoki chegaralarni buzish insonni zinoga, gunohga va oilaning buzilishiga olib borishi mumkin. Bu esa oqibatda xuddi o’lim kabi og’ir falokatga sabab bo’ladi.

Shuning uchun ayol kishi qaynisi yoki erining boshqa nomahram qarindoshlari bilan xoli qolmasligi, bir uyda yolg’iz bo’lmasligi kerak.

Hayotda ham ko’p bora eshitamizki, ayrim oilalarda aynan mana shunday ehtiyotsizlik sababli katta fitnalar va zino ishlari sodir bo’lib qoladi. Bunga sharoit yaratilgani uchun Rasululloh sollallohu alayhi vasallam bunday holatdan qattiq ogohlantirganlar.

Hadisdagi “o’lim” so’zi qo’rqitish va ogohlantirish ma’nosidadir. Inson o’limdan qanday qochsa, mana shunday fitna sabablaridan ham shunday qochishi kerak.

Vallohu a’lam.