Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Ha, bu sahih hadis.

Rasululloh sollallohu alayhi vasallam aytganlarida sahobalar:

— “Ey Allohning Rasuli, biz sizning birodarlaringiz emasmizmi?” — deb so’rashgan.

Shunda Rasululloh sollallohu alayhi vasallam:

— “Sizlar mening ashoblarimsizlar. Mening birodarlarim esa hali kelmagan qavmdir. Ular meni ko’rmasdan turib menga iymon keltiradilar.” — deganlar.

Demak, Rasululloh sollallohu alayhi vasallam maqtagan kishilar — o’zlarini ko’rmagan holda Allohga va Rasuliga iymon keltirib, sunnatlariga ergashadigan mo’minlardir.

Sahobalar Rasulullohni ko’rib, u zot bilan birga yashab, sunnatlariga ergashganlar. Keyingi ummat esa Rasulullohni ko’rmagan holda, faqat Qur’on va sahih sunnat orqali u zotga ergashadi. Rasululloh sollallohu alayhi vasallam aynan shu fazilatlarini e’tirof etganlar.

Lekin bu keyingi ummat sahobalardan afzal degani emas. Sahobalarning o’zlariga xos fazilatlari bor. Ular vahiy nozil bo’lgan davrda yashaganlar, Rasululloh sollallohu alayhi vasallam bilan jihod qilganlar va Islomni bizgacha yetkazganlar. Hech kim bu fazilatda ularga tenglasha olmaydi.

Shunday ekan, bu hadisda Rasululloh sollallohu alayhi vasallam keyingi ummatning Rasulullohni ko’rmasdan turib iymon keltirishi va sunnatlariga ergashishini maqtaganlar.

Vallohu a’lam.