Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Ha, bolani har bir xatosi uchun urishib, koyib, qo’rqitib tarbiyalash uning qo’rqoq bo’lib qolishiga sabab bo’lishi mumkin.

Ba’zi ota-onalar bola qo’lini ovqatga uzatsa ham uradi, biror narsa qilsa ham uradi, o’tirsa ham koyiydi, tursa ham koyiydi. Bunday tarbiya bolaning shaxsiyatini ezib qo’yadi. Natijada u jur’atsiz, qarorsiz va qo’rqoq bo’lib ulg’ayadi.

Endi buning aksini qilish kerak.

Bolaga imkon qadar erkinlik bering. Agar biror narsani sindirib qo’ysa, darrov urishmang. Aksincha, nima uchun bu ish noto’g’ri ekanini tushuntiring.

Masalan: “Qara, buni sindirding. Bu mehnat bilan olingan narsa edi”, deb xatosini anglatishga harakat qiling.

Tarbiyaning maqsadi bolani qo’rqitish emas, balki xatosini tushuntirishdir.

Qo’rqib bir ishni qilmay qo’yish boshqa, uning noto’g’riligini tushunib tark etish boshqa.

Agar bola nima uchun xato qilganini tushunsa, asta-sekin o’sha ishni o’zi tark qiladi. Ana shunda uning shaxsiyati ham sog’lom shakllanadi.

Siz ilgari qattiqqo’llik qilgan bo’lsangiz, endi ko’proq mehr bilan, sabr bilan tushuntirishga harakat qiling. Vaqt o’tishi bilan, Allohning izni bilan, uning ruhiy holati ham yaxshilanadi.

Vallohu a’lam.