Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masalada dalillar juda ochiq va qat’iydir. Rasululloh ﷺ aytganlar:

“Hech bir erkak begona (nomahram) ayol bilan yolg‘iz qolmasin. Chunki uchinchilari shayton bo‘ladi.”
(Imom Ahmad, at-Tirmiziy va boshqalar rivoyati)

Bu hadisda erkak va nomahram ayolning yolg‘iz qolishi mutlaqo man etilgan. Sababi, bu holatda shayton ularning orasiga vasvasa solishi, gunohga undashi oson bo‘ladi. Bu esa zino xavfining boshlanishi hisoblanadi.

Shuningdek, Alloh taolo aytadi:

وَإِذَا سَأَلْتُمُوهُنَّ مَتَـٰعًۭا فَسْـَٔلُوهُنَّ مِن وَرَآءِ حِجَابٍۢ ۚ ذَٰلِكُمْ أَطْهَرُ لِقُلُوبِكُمْ وَقُلُوبِهِنَّ ۚ

Qachonki ulardan biror narsa so`rasangiz, parda ortidan so`rang. Shunday qilmog`ingiz o`z qalblaringiz uchun ham, ularning qalblari uchun ham pokroqdir.
(Ahzob surasi, 53-oyat)

Bu oyatdan anglashiladiki, hatto sahobalar Rasululloh ﷺning ayollari bilan gaplashishda to‘g‘ridan-to‘g‘ri emas, parda ortidan gaplashishlari buyurilgan. Bu esa shuni anglatadiki, erkak va ayolning bevosita aloqa qilishi (hatto eshik ochiq bo‘lsa ham) yengil qaraladigan masala emas.

Agar eshik ochiq bo‘lsa, tashqarida odamlar bo‘lib, ovoz eshitilib turgan bo‘lsa — bu holat to‘liq “xilvat sahiha” (ya’ni to‘liq yolg‘iz qolish) hisoblanmaydi. Bunday holatda fitna ehtimoli kamayadi. Ammo ehtiyotkorlikni qo‘ldan bermaslik kerak.

Ustoz va shogird, shifokor va bemor, ruqya qiluvchi va ayol bemor, hattoki dars yoki maslahat sharoitida ham ehtiyot bo‘lish shart. Hozirgi kunda ko‘plab ustoz va shogirdlar o‘rtasida, yoki boshqa diniy/ilmiy ko‘rinishdagi aloqalarda nojo‘ya voqealar aynan yolg‘iz qolish va ishonchni suiste’mol qilish oqibatida yuz bermoqda.

Shariat zinoni harom qilganidan so‘ng, unga olib boradigan barcha yo‘llarni ham harom qilgan. Masalan:

• Ayol kishining nozik ohangda gapirishi harom qilingan (Ahzob 32),

• Ayol ziynatini ko‘z-ko‘z qilishi harom (Nur 31),

• Erkaklarga ko‘zini tiyish buyurilgan:

• قُل لِّلْمُؤْمِنِينَ يَغُضُّوا۟ مِنْ أَبْصَـٰرِهِمْ وَيَحْفَظُوا۟ فُرُوجَهُمْ ۚ ذَٰلِكَ أَزْكَىٰ لَهُمْ ۗ إِنَّ ٱللَّهَ خَبِيرٌۢ بِمَا يَصْنَعُونَ٣٠

• Siz mo`minlarga ayt, ko`zlarini tiysinlar va farjlarini saqlasinlar. Ana shu ular uchun pokdir. Albatta, Alloh nima hunar qilayotganlaridan xabardordir.
  (Nur surasi, 30-oyat)

Bu oyatlardan ham ko‘rinadiki, zinoga olib boruvchi barcha eshiklar yopilgan.

Xulosa:

1. Nomahram erkak va ayolning yolg‘iz qolishi joiz emas, hatto shahvatsiz qarash bo‘lsa ham, bu ehtiyot chorasiga zid.

2. Eshik ochiq bo‘lishi va tashqarida odamlar bo‘lishi holatni yumshatadi, ammo ehtiyotsizlik qilmaslik zarur.

3. Har qanday shaklda, ustoz-shogird, shifokor-bemor, ruqya qiluvchi va ayol bemor holatlarida yolg‘iz qolishdan ehtiyot bo‘lish kerak.

4. Zinoning haromligi bilan birga, unga olib boradigan har qanday sabablar ham harom qilingan.

Vallāhu a‘lam.