Ustoz, bir hovlida nomahram ikkita qaynim bilan birga yashayotganimiz, ba'zan ularning yumushlari bo‘lsa bajarayotganim, turmush o‘rtog‘imga itoat qilib, norozi bo'lsamda chidab yashayotganim uchun men gunohkor bo‘lmaymanmi? • islomiy savol

Ustoz, bir hovlida nomahram ikkita qaynim bilan birga yashayotganimiz, ba’zan ularning yumushlari bo‘lsa bajarayotganim, turmush o‘rtog‘imga itoat qilib, norozi bo’lsamda chidab yashayotganim uchun men gunohkor bo‘lmaymanmi?

Nashr sanasi: May 26, 2025

Savol raqami: 1869

Ko'rilgan: 18

Savol :

Ustoz, oilada ikkita bo‘ydoq qaynim bilan birga yashaymiz. Ulardan biri — turmush o‘rtog‘imning ukasi, ikkinchisi esa qaynonamning singlisining o‘g‘li. U bizning uyda turib ishlaydi. “Qachon uylansam, o‘shanda ketaman,” deydi. Ularning menga nomahram ekanini bilsam-da, ular bilan gaplashaman, ba’zan yumushlari bo‘lsa bajaraman.

Turmush o‘rtog‘im qo‘shni davlatda ishlagan, biz bir muddat chet elda yashadik. Hujjatlar, ilm olish va farzandimizni o‘qitish imkoniyati bo‘lmaganligi sababli qaytishga majbur bo‘ldik. Hozirgi uy sharoitimiz qalbimni xotirjam qilmayapti. Umuman olganda, bizning o‘zbek oilalarida bunday masalalarga yetarli darajada e’tibor berilmaydi.

Turmush o‘rtog‘im ham erta bilan ishga ketadi, kech qaytadi. Ba’zan uyda o‘sha yigit bilan yolg‘iz qolib ketaman. Bunday holatlarga u kishi ko‘p e’tibor bermaydi. “Bu yaxshi holat emas, bu yerda shariat nima deydi?” desam, “Men nima ham qila olaman? ‘Ket’ deb ayta olmayman, onamning hurmati bor,” deydilar.

Ba’zida tortishib qolsak, “Bunday yashash yoqmasa, o‘zingga yoqadigan hayotda yashagin,” deb aytadi. Ko‘p shar’iy masalalarda qiynalaman. Allohga itoat qilish kerakligini bilsak-da, go‘yo bandalarni rozi qilish uchun yashayotgandekmiz.

Qalbim bu holatga rozi emas. Ustoz, maslahat bering, turmush o‘rtog‘imga itoat qilib, bunday holatlarga chidashim men uchun gunoh bo‘lmaydimi?

Javob :

O’xshash savol-javoblar

Bu og‘ir holat, lekin Allohu a’lam, sizning bu holatda sabr qilganingiz yaxshi. Alloh taologa osiy bo‘lmaslik sharti bilan sabr qiling. Nomahram va mahram masalasiga qat’iy rioya qiling. Qiyinchilik bo‘lsa ham, Alloh uchun sabr qiling. Sizning bu sabringiz, insha Alloh, savobli bo‘ladi va Alloh o‘zi baraka ato etadi.

Bismillahir rohmanir rohiym. Alhamdulillah, vassalatu vassalamu ‘ala Rasulillah, amma ba’d.

Bu og‘ir holat, lekin Allohu a’lam, sizning bu holatda sabr qilganingiz yaxshi. Alloh taologa osiy bo‘lmaslik sharti bilan sabr qiling. Ya’ni, hozirgi holatda, o‘sha yigit bilan bir xonada yolg‘iz qolmang. Agar uyda qolib ketish holati bo‘lsa ham, uyingiz, xonangiz alohida bo‘lsin va hijobda bo‘ling.

Ularga keraksiz gaplarni gapirmang. Ayniqsa, eringiz uyda yo‘q paytda, tamoman ko‘zlariga ko‘rinmang. Ehtiyot bo‘ling. Agar biror yumushi bo‘lsa, eringiz uyda bo‘lgan paytda, masofani saqlagan holda, ehtiyotkorlik bilan yordamlashsangiz bo‘ladi. Shunda ular ham o‘rganib qolishadi.

“Ket,” deb aytish shart emas. Ammo eringizga bu holatni tushuntirib, o‘sha yigitga muloyimlik bilan aytishini so‘rasa bo‘ladi. Bu muammo birdan hal bo‘lmasligi mumkin, lekin asta-sekin taqvo ila yo‘l tutish kerak. Qur’onda ham: “Fattaqullaha ma’stata’tum”, ya’ni “Qo‘lingizdan kelganicha Allohdan qo‘rqib taqvo qiling,” deyilgan.

Bu holat, “nima bo‘lsa bo‘ldi, ajrashib keting,” deyish kerak bo‘lgan darajadagi holat emas. Yigit ham uylanib ketsa, bu vaqtinchalik holat, insha Alloh. Sabrli bo‘ling, ammo ehtiyot choralari va shariatga muvofiq qoidalarni unutmang.

Nomahram va mahram masalasiga qat’iy rioya qiling. Qiyinchilik bo‘lsa ham, Alloh uchun sabr qiling. Sizning bu sabringiz, insha Alloh, savobli bo‘ladi va Alloh o‘zi baraka ato etadi.

Vallohu a’lam.

Javob muallifi:

Shayx Sodiq Samarqandiy

Maqola foydali bo’ldimi?

Yo’nalishlar

Bizga bog’laning