Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bunday holatdan qutulish uchun avvalo shaytonni yomonligidan panoh tilang — har namozdan oldin va namoz paytida ichingizda:

“A‘ūdhu billāhi min ash-shayṭānir-rajīm”
— deb ayting. Bu holat ko‘pchilikda bo‘ladi va bu shaytonning vasvasasidir.

Ikkinchidan, namozda kimning huzurida turganingizni chuqur o‘ylang — bu namoz oddiy mashq emas, bu Robbingiz bilan muloqotdir. Alloh taolo sizni ko‘rib turibdi, siz Uni ko‘rayotgandek ibodat qilishingiz kerak.

Alloh taoloning go‘zal ismlari, sifatlari va buyuk qudrati haqida ko‘proq o‘rganing, tafakkur va tadabbur qiling. Bu qalbda xushu’ (diqqat va kamtarlik) hosil qiladi.

Shuningdek, namozdagi har bir so‘z va harakatning ma’nosini tushunishga harakat qiling. Ma’nosini bilganingiz sari diqqat va tafakkur oshadi.

Doimiy ravishda Allohga duo qilib so’rang, va Alloh taolo o’zi yo’l ko’rsatadi.

Vallāhu a‘lam.