Bismillah, alhamdulillah, vassalatu vassalamu ‘ala rasulillah, amma ba’d.

Albatta, emikdoshlar agar oila qurgan bo‘lsa, bu turmush — haqiqiy turmush emas. Chunki bu xato yo‘l bilan qurilgan bo‘ladi. Garchi bu holatda zino deyilmasa-da, unda shubha bo‘lgani uchun bu nikoh noto‘g‘ri hisoblanadi. Shuning uchun bunday holatda er-xotin ajralishi lozim. Bolalar otasiga nisbat beriladi, lekin bu nikoh halol nikoh bo‘lmaganligi sababli, bu oila davom eta olmaydi.

Chunki emikdosh bo‘lganlar o‘rtasida nikoh harom bo‘ladi. Emikdoshlik — mahramlik sababidir, u holda nikoh o‘rnatilmaydi. Shu bois, ular darhol ajralishlari kerak.

Lekin, silai rahm – ya’ni qarindoshlik aloqalarini davom ettirish — bu yerda saqlanadi. Chunki ular bir-biriga mahram bo‘lib qolishadi. Shu mahramlik asosida silai rahm qilishadi.

Biroq, agar “silai rahm qilayapman” degan bahona bilan ular yana yolg‘iz qolib, ilgari er-xotin bo‘lib yashagan odatlariga qaytib qolish xavfi bo‘lsa, unday holatda ehtiyot bo‘lish lozim. Chunki ular o‘rtasida ilgari hijob tushgan, pardalar ko‘tarilgan bo‘ladi.

Shunday holatlardan ehtiyot qilish kerak. Agar fitnadan qo‘rquv bo‘lsa, unda silai rahmni uzoqdan turib, masofani saqlagan holda davom ettirish kerak bo‘ladi.

Vallohu a’lam.