Bismillah, alhamdulillah, ‘ala rasulillahi va ba’d.
Endi ilm o‘qishni davom ettirish kerak. Odam doim o‘rganishda davom etishi lozim. Meningcha, eng ko‘p foyda bergan narsa — bu ilmni izchil tarzda o‘rganish bo‘lgan. Ayniqsa, Ibn Qayyim rahimahullohning kitoblari qalbni isloh qilishga juda katta yordam beradi.

Agar bu kitoblarni tushunib o‘qisangiz, juda foydali bo‘ladi. U zotning ko‘p kitoblarini sharhlaganmiz. Shuningdek, tafsir darslarini ko‘proq eshiting. Ayniqsa, Makkiy suralarda aqida asoslari, Alloh taoloni tanishtiradigan, oxirat hayotini eslatadigan, Rasululloh (s.a.v.)ning risolatini tushuntiradigan ma’nolar ketma-ket keltirilgan bo‘ladi. Bular qalb uchun malham hisoblanadi.

Alloh taolodan so‘rab, oldinga qarab harakat qiling. Rasululloh sallallohu alayhi va sallam aytganlar: “Valakin sa‘atan fa sa‘ah” – ya’ni vaqti-vaqti bilan (ilm o‘rganing, ibodat qiling). Bu ilm sekin-sekin bo‘ladi. Bir kechada odam avliyoga aylanmaydi, yoki bir uxlab olim bo‘lib uyg‘onib qolmaydi.

Musulmonchilik asta-sekin bo‘ladi, kofirlik esa bir pastda, deb aytishadi xalq orasida. To‘g‘ri gap bu. Inson ma’rifatda sekin-asta o‘sib boradi, qalbi asta-sekin ochiladi. Bugun bilmaganini ertaga o‘rganadi. Shu tariqa qalbi isloh bo‘lib boradi.

Alloh taolodan tavfiq, hidoyat, qalbingiz ochilishini so‘rang. To‘g‘risini aytganda, hammamiz ham shu darddamiz aslida. Qalb ustini zang bosib qolmasligi uchun unga doimiy e’tibor kerak. Pichoqni ishlatmasangiz zang bosadi — qalb ham xuddi shunday.

Uni tez-tez istig‘for bilan, iymonlashish bilan, ahli ilm bilan suhbat qilish, ilmiy suhbatlar qilish, kitob o‘qish orqali sayqallab turish kerak. Bo‘lmasa, yana orqaga qarab ketaveradi.

Allohu a’lam.