Bismillah, alhamdulillah, vassalatu vassalam ‘ala rasulillah va ba’d. Bu ish Hanafiy mazhabiga ko‘ra to‘g‘ri. Chunki o‘sha “vakil ota” otaning vakili bo‘lib, otaning ruxsatini olib keladi. Ota ruxsat berganini bildiradi, ya’ni “nikohga ruxsat bo‘ldi” degan ma’noda kelib: “Bo‘ldi, nikoh o‘qiyverishingiz mumkin”, degan xabarni yetkazadi.

Keyin kelin-kuyovni o‘rtaga qo‘yib, imom nikoh o‘qiydi, ikkisining roziligini oladi, ijob qiladi va qabul qiladi. Bu Hanafiy mazhabiga ko‘ra to‘g‘ri. Bunda hech qanday muammo yo‘q. Faqat u vakil ota ota tomonidan berilgan vakolatni yetkazadi, ya’ni “nikoh o‘qishga ruxsat berildi” degan ma’nodagi xabarni olib keladi.

Bu yerda aslida masala shundaki: valiy qatnashishi shartmi yoki ayolning o‘zi “roziman” deb nikoh qilaverishi mumkinmi? Mana shu masalada ixtilof bor. Hanafiy mazhabi ulamolarining fikricha, agar ayol balog‘atga yetgan bo‘lsa va tasarrufni yaxshi qiladigan, aqlli, hushyor bo‘lsa, o‘zi nikoh qilaveradi.

Bu eski xilof masalalardan biri. Bu haqida ko‘p javoblarimizda aytganmiz. Xulosa qilib aytganda, Hanafiy mazhabiga ko‘ra bu ish to‘g‘ri bo‘ladi.

Vallohu a’lam.