Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Aslida bunday holatda nikoh bog‘lanishi mumkin. Lekin masala aytilgan so‘zlarning ma’nosi va niyatiga bog‘liq.

Arab tilida xabar va insho degan tushunchalar bor.

Masalan, sovchilik paytida:

“Bo‘ldi, qizimiz sizlarniki”, deyiladi. Qarshi taraf ham: “Qabul qildik”, deydi. Bu gaplar bilan nikoh bog‘lanib qolmaydi. Chunki bu yerda gap va’da va kelajak haqidagi xabar ma’nosida bo‘ladi.

Ya’ni: “Kelajakda qizimizni sizlarga beramiz”, degan ma’no tushuniladi.

Nikoh esa odatda insho, ya’ni ayni paytda nikohni vujudga keltiruvchi lafzlar bilan bo‘ladi. Masalan:

“Qizimni senga nikohladim” yoki “Qizimni berdim” deganda hozirning o‘zida nikohni tuzish ma’nosi nazarda tutiladi. Qarshi taraf: “Qabul qildim” desa, nikoh bog‘lanadi.

Shuning uchun, agar qizning otasi:

“Men faqat roziligimni bildirdim, kelajakda nikoh qilishga roziman degan ma’noda aytdim”, deb tushungan bo‘lsa va asl niyati ham shu bo‘lgan bo‘lsa, unda masala niyatga qarab baholanadi.

Bunday holatda qalbda shubha qolmasligi uchun nikohni qaytadan o‘qib qo‘yish yaxshi bo‘ladi. Bu qiyin ish emas. Nikohni yangidan, barcha shartlariga rioya qilgan holda o‘qib qo‘yilsa, shubha ham ketadi, ko‘ngil ham xotirjam bo‘ladi.

Vallohu a’lam.