Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bunday holatda ayol gunohkor hisoblanmaydi. Chunki ayolning gunohkor bo‘lishi uchun erning yaqqol talab qilishi, ya’ni yaqinlikni aniq so‘rashi kerak. Agar er talab qilsa va ayol hech qanday uzrsiz rad etsa — u holda, ha, ayol bu hadis doirasiga kiradi.

Ammo bu holatda er o‘z xohishini so‘z bilan ham, imo-ishora bilan ham bildirmagan, faqat ichidan o‘tgan narsani ayol tushunishini kutgan. Bu esa shariatda talab deb hisoblanmaydi.

Er va xotin o‘rtasidagi yaqinlik masalasi o‘zaro hurmat, e’tibor va ochiq muloqotni talab qiladi. Er xotiniga noaniq ishoralar bilan emas, ochiq, muloyim, odobli shaklda o‘z istagini bildirishi kerak.

Shuningdek, Alloh taolo Qur’onda aytadi:

وَلَهُنَّ مِثْلُ ٱلَّذِى عَلَيْهِنَّ بِٱلْمَعْرُوفِ ۚ

Va yaxshilik ila ularning burchlari muqobilida haqlari ham bordir. 

(Baqara surasi, 228-oyat)

Demak, er qanday iltifotni xohlayotgan bo‘lsa, xotin ham shunday munosabatni kutishga haqli. Oilaviy hayotda bir tomonlama talab qilish emas, balki o‘zaro tushunish va hurmat muhim.

Agar er istagini aniq bildirib, xotini hech bir uzrsiz rad etsa — bu holatda farishtalarning la’nati haqidagi hadis o‘rinli bo‘ladi. Ammo er bunday aniq talab qilmagan bo‘lsa, ayolning gunohkor bo‘lishi to‘g‘ri emas.

Xulosa:

Agar er o‘z xohishini ochiq bildirmagan bo‘lsa, ayol unga javob bermagani uchun gunohkor hisoblanmaydi. Har ikkisi o‘zaro muloqotda ochiq, mehribon va halol bo‘lishi kerak. Hadislarni faqat bir tomonning foydasiga burib talqin qilish noto‘g‘ridir.

Vallāhu A‘lam.