Ustoz, bir inson ota-onasiga yomon muomala qilib, og‘ir so‘zlar aytgan, hattoki urgan. Keyin esa xatosini tushunib, chin dildan tavba qilsa, Alloh kechiradimi? U inson namoz o‘qiydi, musulmon, lekin ota-onasini hurmat qilmaydi. Ota-onasining ham unga mehri yo‘q. U kishi chin dildan tavba qilsa, bu gunohlarning dunyodagi asoratlari (masalan, farzanddan qaytish) barham topadimi?
Agar chin dildan tavba qilsa, albatta Alloh kechiradi. Chunki Alloh shirkdan boshqa barcha gunohlarni tavba qilgan bandasi uchun kechiradi. Ammo ota-onaga qilgan beodoblik faqat Alloh bilan bo‘lgan gunoh emas, bu bandaga — ota-onaga nisbatan qilingan zulmdir. Shuning uchun faqat Allohdan tavba qilish yetmaydi, balki ota-onaning roziligini ham olish lozim.
Ota-onani xafa qilgan va yomon muomala qilgan bo’lsa, ularni xursand qiladigan, rozi qiladigan amallarni qilish kerak. Xizmat qilish, ularni ko‘nglini olish, duolarini olish — chin tavbaning belgilaridan. Zero, Rasululloh sollallohu alayhi vasallam: “Ota rozi bo‘lsa, Alloh rozi bo‘ladi”, deganlar. Demak, Allohning roziligi ota-onaning roziligiga bog‘liq.
Faqat “men tavba qildim” deyish bilan ish bitmaydi, agar ota-onani rozi qilmagan bo‘lsa, bu hali to‘liq tavba hisoblanmaydi. Zulm qilingan bo‘lsa, uni joyiga qo‘yish, haq egasidan halollik olish shart.
Farzanddan qaytish masalasiga kelsak: agar tavbasi chin bo‘lsa, Alloh uni farzanddan qaytarmaydi, insha Alloh. Chunki Allohning mag‘firati faqat gunohni kechirmaydi, balki uning dunyodagi yomon oqibatlarini ham to‘sadi. Mag‘firat so‘zining lug‘aviy ma’nosi ham “to‘sish” demakdir. Alloh mag‘firat qilgan bandani gunohining zararlari va asoratlaridan ham saqlaydi.
Xulosa: Chin tavba qilinsa, ota-onani rozi qilishga harakat qilinsa va Allohdan mag‘firat so‘ralib, bu amal bilan tasdiqlansa — Alloh kechiradi, va uning rahmati bilan bu gunohning dunyodagi asoratlari ham barham topadi, insha Alloh.
Vallohu a‘lam.