Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Ba’zi odamlar: xatmni bomdodda tugatish kerak, bomdodning ikki rakat sunnatida tugatish kerak, farzida tugatish kerak, yangi kun Qur’on bilan boshlanib, Qur’on bilan tugasin, deb turli gaplarni aytishadi. Ammo bu gaplarning hech biriga qat’iy dalil yo‘q.

Shariatda bo‘lmagan narsalarni o‘zimizdan chiqarib, masalani murakkablashtirmasligimiz kerak. Qur’onni xatm qilishning o‘zi ibodat. Uni qachon boshlash va qachon tugatish masalasida hech qanday cheklov yo‘q.

Muhimi — Qur’onni tartib bilan, ixlos bilan o‘qish. Bugun tugatsangiz ham bo‘ladi, ertaga tugatsangiz ham bo‘ladi. Bugun xatm qilib, ertaga yana boshidan boshlasangiz ham — baribir Qur’on o‘qigan bo‘lasiz.

Xatmni qaysi vaqtda tugatish afzal degan masalada qat’iy bir vaqt belgilanmagan. Alloh taolo Qur’onni har qanday vaqtda o‘qilgan holatda ham qabul qilishga qodir. Muhimi — o‘qishning o‘zi.

Qachon va qancha bo‘lishidan qat’i nazar, Alloh subhanahu va taolo o‘qilgan Qur’onni qabul qilishga qodir Zotdir.

Shuning uchun:
o‘qing, xatm qiling, yana o‘qing — hammasi Qur’on, hammasi savob.

Allohu a‘lam.