Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu nikoh Hanafiy mazhabiga ko‘ra sahih hisoblanadi.

Agar ayolingizning otasi unga:
“O‘zing istagan odamingga turmushga chiq, baxtingni top, farzandli bo‘l”
deb umumiy ruxsat bergan bo‘lsa — bu holatda masala yanada yengillashadi.

Har qanday holatda ham, Hanafiy mazhabiga ko‘ra, bu nikoh to‘g‘ri va sahih hisoblanadi. Bizning taraflarda ham ko‘plab odamlarning nikohi shunday bo‘lgan: ayolning o‘zi kelib, imom huzurida, eri bilan birga nikoh o‘qitilgan.

Albatta, ota-onaning roziligi, quda-andachilik, sovchilik, to‘y kabi marosimlar — bular bizning odatlarimizda muhim. Ko‘pincha nikohdan oldin hamma xabardor bo‘ladi, ota-onalar, qarindoshlar ishtirok etadi.

Ammo shunga qaramay, Hanafiy mazhabida balog‘atga yetgan, aqli raso ayol o‘zini o‘zi nikohlashi mumkin. Bu — Imom Abu Hanifa rahimahullohning mazhabi.

Shu sababli, bu nikoh bo‘lib o‘tgan bo‘lsa va hozir birga yashayotgan bo‘lsangiz — yashayvering, nikohingiz sahih.

Qolaversa, ayolingizning otasi ham unga oldindan umumiy ruxsat bergan ekan. Agar nikohdan oldin so‘raganingizda, “Valiy toping” deb aytgan bo’lar edim. Ammo nikoh allaqachon o‘qilgan ekan, endi bismillah deb, Allohga tavakkal qilib davom etavering. Chunki bu nikoh Abu Hanifa rahimahulloh mazhabiga ko‘ra to‘g‘ri.

Guvohlar bo‘lgan, ikki tomonning roziligi bilan bo‘lgan. Endi qilinadigan ish — nikohni e’lon qilish. Ayolingizning ahli ham, qaynota-qaynonangiz ham sizlarning er-xotin ekaningizni bilsin.

Vallohu a‘lam.