Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu juda og‘ir va nozik masala. Bunday holatda aniq va keskin hukm berish juda qiyin.

Siz 16 yil yashagansiz, katta xizmatlarni qilgansiz. Hozir esa qaynakangiz uylangan, vaqt o‘tib baribir oilalar ajraladi, bolali bo‘lishadi, kimdir alohida chiqib ketadi. Shuning uchun agar yana biroz sabr qilish imkoningiz bo‘lsa, bu ham bir yo‘l bo‘lishi mumkin.

Ko‘pincha bizning jamiyatda kichik o‘g‘il ota-onasi bilan qoladi, kelin bilan. Shu jihatni inobatga olib, ehtimol, vaqt o‘tib vaziyat yengillashar. Ammo bu — faqat taxmin.

Shuni ham aytish kerakki, tashqaridan turib:

• “Sabr qil,” deyish oson,

• “Chiqib ket,” deyish esa yanada og‘ir.

Hech kim sizning o‘rningizga qaror qabul qila olmaydi. Hayotning og‘irini ham, yengilini ham insonning o‘zi biladi. “Ko‘rpa qanchalik issiq yoki sovuq ekanini egasi biladi,” degan gap bor.

Shariatning asosiy maqsadi — oilani saqlab qolish, imkon qadar buzmaslik. Shu sababli bu masalada shoshilinch qaror chiqarmasdan, Allohga ko‘proq murojaat qilish, duo qilish, hidoyat va yechim so‘rash juda muhim.

Alloh taolo har bir mushkul ishga bir eshik ochadi. Sabr bilan, duo bilan, aql bilan harakat qilinsa, insha Alloh, yaxshilik tomonga yo‘l ochiladi.

Vallohu a’lam.