Bismillah,
Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo‘lsin.

Shariat bo‘yicha siz istagan xotiningizni olishingiz mumkin. Ya’ni siz balog‘atga yetgan o‘g‘il bolasiz, sizga hech kim “uni olma” deyolmaydi. Kimni yoqtirsangiz — shuni olasiz, yaxshi ko‘rsangiz olasiz, yaxshi ko‘rmasangiz olmaysiz. Lekin onangiz bilan maslahat qilish ham kerak bo‘ladi.

Chunki hayotingiz davomida agar olgan kelingiz onangizga yoqmasa, yashatmaydi-da. Ertaga muammodan boshingiz chiqmaydi. Bu yoqqa qarasangiz — xotiningiz, bu yoqqa qarasangiz — onangiz: har kuni bosh og‘riq, har kuni muammo. Shuning uchun onangizga ham yoqadigan bo‘lishi kerak.

Modomiki birga yashayotgan bo‘lsangiz. Agar uylanib, birga yashamasdan alohida yashasangiz, unda muammo yo‘q. O‘zingiz xohlagan ayolingizni olib, baxtli bo‘lib ketishingiz mumkin. Lekin ona bilan birga yashasangiz, onangizga kelin ma’qul kelmasa — u ona yashatmaydi. Odat shunaqa, bilaman men.

Shuning uchun onani ham rioya qilish kerak. Juda yaxshi ko‘rib qolgan bo‘lsangiz, ajrala olmaydigan darajada bo‘lsangiz — unda qanday bo‘lsa ham nikoh qilib, o‘sha bilan yashang derdim. Lekin agar bu darajada bo‘lmasa, faqat “yoqtirib qoldim, menga ma’qul qiz ekan”, degan bo‘lsangiz-u, onangizga ma’qul kelmasa — unda onangiz yoqqan tarafni ham e’tiborga olish kerak.

Chunki “mentalitet” degan narsa bor: ularning tutumi bilan onangizning tutumi kelishmasa, onangiz keyin bahona chiqaraveradi. Biror narsa desangiz, “noroziman” deydi. Shunda ko‘r-ko‘rona xotiningizga zulm qila olmaysiz.

Ikkita temir orasida qolib ketasiz keyin. Shuning uchun hozirdan aql bilan ish qiling. Onangizga ham mos keladigan xotinga uylaning. Agar uylanib, ona bilan yashamay, chiqib ketib, alohida yashayotgan holatda bo‘lsangiz, o‘sha qizni olsangiz bo‘ladi.

Bemalol, chunki siz u bilan alohida yashaysiz, onangizni esa har zamonda ko‘rasiz.

Vallohu a’lam.