Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Ha, albatta, ayolning haqqi bor – mahrini so‘rashi joiz va gunoh emas. Chunki mahr – nikoh paytida alohida shart qilingan narsa. Erning “yedirib-ichirib, kiydiryapman” deyishi mahrni bermaslikka uzr bo‘lolmaydi.

Erkak uylanganidan keyin: ayolning yeb-ichishi, kiyimi, turar joyi, kundalik sarf-xarajati – bularning hammasi erning zimmasidagi majburiy vazifa. Bu vazifani ado etish bilan mahrdan qutulib qolmaydi.

Rasululloh ﷺ aytganlar:
مَطْلُ الغَنِيِّ ظُلْمٌ
“Imkoniyati bo‘la turib (haqni) kechiktirish – zulmdir.” (Buxoriy, Muslim)

Demak, erning imkoniyati bo‘la turib mahrni bermasligi – zulmdir. Ayol talab qilsa – haqqini talab qilgani bo‘ladi, gunoh emas. Faqatgina bu talabni hikmat bilan, odob va ma’ruf bilan qilish afzal.

Vallohu a‘lam.