Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu og‘ir holat, ammo har bir imtihon ortida Allohning bir hikmati bor. Siz sabr qilib, o‘zingizni ayollik vazifangizni bajargansiz. Bu — katta savob. Endi nima qilmoq kerak?

Alloh Qur’onda aytadi:

يَـٰٓأَيُّهَا ٱلَّذِينَ ءَامَنُوا۟ عَلَيْكُمْ أَنفُسَكُمْ ۖ لَا يَضُرُّكُم مَّن ضَلَّ إِذَا ٱهْتَدَيْتُمْ

“Ey mo‘minlar, siz o‘zingizni o‘ylang. Siz to‘g‘ri yo‘lda bo‘lsangiz, adashganlar sizga zarar yetkaza olmaydi.” (Al-Moida: 105)

Demak, eringizning noto‘g‘ri ishlariga qaramay, siz o‘zingizni tuzatishga, Allohga yaqin bo‘lishga harakat qiling. Rashk va og‘riq tabiiy, ammo sabr — eng ulug‘ fazilatdir. Agar Alloh uchun sabr qilsangiz, U qalbingizga taskin, halovat va iymon rohatini beradi.

Sizga maslahat: hozirgi paytda eringizga e’tiborni kamaytiring, o‘zingizni, farzandingizni, va oxiratingizni o‘ylang. Har narsani Allohga topshiring. Alloh taolo aytadi:

وَمَن يَتَّقِ ٱللَّهَ يَجْعَل لَّهُۥ مَخْرَجًۭا ٢

وَيَرْزُقْهُ مِنْ حَيْثُ لَا يَحْتَسِبُ… ٣

“Kim taqvo qilsa, Alloh unga najot yo‘li ochadi va o‘ylamagan joydan rizq beradi.” (At-Talaq: 2-3)

Rizq — bu faqat pul emas. Odamlar qalbidagi muhabbat, hurmat, yaxshi muomala — bular ham rizq. Agar siz taqvo bilan yashasangiz, Alloh sizni kutmagan tarzda yengillikka chiqaradi.

Shuning uchun, Allohdan yordam so‘rang, duo qiling, sabr qiling, va taqvoni yo‘ldosh qiling. Alloh sizga albatta eng hayrli yo‘lni ochadi.

Vallāhu a‘lam.