Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Bu masalada aniq hukm aytish qiyin. Chunki agar qo‘shnilar o‘z pullarini sarflab suv quvurini torttirgan bo‘lsalar, unda ularning ham haqqi bor.

Aslida ular qo‘shnichilik haqqini inobatga olib, sizga ruxsat bersalar, yaxshi bo‘lar edi. Ammo modomiki rozi bo‘lmayotgan ekanlar, ularga bildirmasdan quvur tortib olishingiz shar’an joiz bo‘lmaydi.

Buning yechimi shuki:

• yoki o‘zingiz alohida quvur torttirishingiz kerak. Balki buning xarajati siz uchun qimmat tushar;
• yoki sabr qilishingiz kerak.

Yana bir yo‘li — hukumatga yoki suv ta’minoti mas’ullariga murojaat qilib, masalani hal qilishlarini talab qilishingiz kerak.

Ularga: “Menga ham suv kerak. Qo‘shnilar mana shunday deyapti”, deb tushuntiring. Agar ular: “Qo‘shnilaringizni rozi qiling”, desa, siz: “Men harakat qildim, lekin rozi bo‘lishmayapti”, deb ayting. Shunda bu masalani tegishli idoralar hal qilishi kerak.

Agar suv ta’minoti mas’ullari ham masalani hal qilib bermasa, o‘zingiz ham markaziy tarmoqdan alohida quvur torttirishga imkon topa olmasangiz, qo‘shnilar ham rozi bo‘lmasa, unda sabr qilasiz. Boshqa iloji qolmaydi.

Lekin ularga bildirmasdan quvur tortib olishingizni joiz, deb ayta olmaymiz. Chunki bunda qo‘shnilarning haqqi bor.

Yana qo‘shnilaringiz bilan gaplashib, iltimos qilib ko‘ring. “Qo‘shnichilik haqqi uchun ruxsat bering, men pulini ham to‘layman”, deb tushuntiring.

Ammo agar ular: “Siz ulansangiz, bizga suv yetmay qoladi”, deb haqiqatan xavotir qilayotgan bo‘lsalar, bu ham ularning haqqidir. Chunki suv yetmay qolsa, pul olganlari bilan muammo hal bo‘lmaydi.

Agar ular o‘z mablag‘lari hisobidan quvur torttirgan bo‘lsalar, siz ham imkon topguningizcha sabr qilib, markaziy tarmoqdan alohida quvur torttirish yo‘lini izlashingiz kerak.

Vallohu a’lam.