Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Agar dasturxon bitta bo‘lsa, ya’ni bir joyda spirtli ichimliklar iste’mol qilinayotgan dasturxonga o‘tirish nazarda tutilayotgan bo‘lsa — bu joiz emas. Chunki bu holatda siz ichkilik bo‘layotgan joyda ishtirok etgan hisoblanasiz.

Masalan, to‘yda bitta mezbon bo‘ladi va u barcha mehmonlarni chaqirgan bo‘ladi. Agar to‘yda spirtli ichimliklar ichilayotgan bo‘lsa — hatto burchakda ichilsa ham — u to‘y bir butun deb qaraladi va siz ham o‘sha muhitda ishtirok etgan bo‘lasiz. Shuning uchun bunday joyga borishdan saqlanish lozim.

Ammo agar siz samolyotda, avtobusda yoki boshqa jamoat transportida bo‘lsangiz, va yoningizdagi kishi spirtli ichimlik iste’mol qilayotgan bo‘lsa — bu hol sizga bog‘liq emas. Chunki siz o‘sha muhitni tanlamagansiz, balki zarurat sababli u yerda bo‘lyapsiz. Samolyot yoki avtobusda ichayotganlar bo‘lsa ham, siz ularning ichkilik majlisida ishtirok etmayapsiz.

Shuningdek, agar siz restoran yoki oshxonada bir burchakda o‘tirib, boshqa bir stolda ichilayotganini ko‘rsangiz, lekin sizning stolingiz alohida bo‘lsa — bu ham xuddi samolyotdagi holatga o‘xshaydi. Bunday holatda siz ichkilik majlisiga sherik hisoblanmaysiz.

Ammo to‘y yoki da’vatda — mezbon bitta, dasturxon bitta — bo‘lsa, bu holat boshqa. U yerga borish “ichkilik bor joyga bordi” deb baholanadi. Shuning uchun bu nojoiz bo‘ladi. Ichkilik bor joyda bo‘lish, hatto ichmasangiz ham, man qilingan.

Vallāhu a‘lam.