Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Gapingiz to‘g‘ri, savolingiz o‘rinli. Bu yerda e’tiroz shariatga emas, balki odamlar orasidagi noto‘g‘ri tushunchalarga qaratilishi kerak.

Ya’ni erkakning xiyonatini “mayli, erkak-da, bo‘lib turadi” deb yengil qabul qilish, ayolning xatosini esa kechirilmaydigan darajada ko‘rish — bu shariatdan emas, balki odamlarning o‘zlari o‘ylab topgan noto‘g‘ri mezonidir.

Shariatimiz erkakparast emas. Erkak yoki ayol bo‘lishidan qat’i nazar, gunoh — gunoh. Zino va fahsh ishlar masalasida Qur’on va sunnatda erkak bilan ayol o‘rtasida farq qo‘yilmagan. Ikkoviga ham bir xil hukm berilgan.

Shuning uchun “erkakniki kechiriladi, ayolniki kechirilmaydi” degan gaplar shariatga emas, balki odamlarning noto‘g‘ri tushunchasiga borib taqaladi. Bu bilan shariatga tuhmat qilish ham to‘g‘ri emas.

Haqiqatda ba’zi erkaklar noto‘g‘ri yo‘l tutib, uylanish o‘rniga turli ayollar bilan gaplashib yuradi, bir necha ayol bilan bir paytda aloqa qilib yuradi, lekin mas’uliyatni zimmasiga olmaydi. Telefonida ko‘plab ayollarning raqamlari, suratlari, ma’lumotlari bo‘ladi, qayerda kim borligini biladi, lekin uylanishga kelganda qadam tashlamaydi.

Bu esa insonning o‘ziga ziyon. Bunday odam umrini behuda o‘tkazadi, qalbini ham, hayotini ham iflos qiladi.

Endi ayol masalasiga kelsak: agar er doimiy ravishda xiyonat qilsa, bu ayolga zulm hisoblanadi. Bunday holatda ayolning taloq yoki ajralish talab qilishi o‘rinsiz emas. Chunki u o‘zini, dinini va hurmatini saqlashni istayapti.

Albatta, har bir holat alohida ko‘rib chiqiladi. Ba’zan sabr qilish foydali bo‘lishi mumkin, ba’zan esa zararli bo‘ladi. Shuning uchun bu kabi masalalarda donolik, maslahat va holatni to‘g‘ri baholash muhim.

Hammamiz gunohkormiz, xatokormiz. Lekin gunohni odat qilib olish, unga oqlov topish — bu xavfli yo‘l. Alloh taolo tavba qiluvchilarni kechiradi, lekin banda o‘zini o‘zgartirishga harakat qilishi kerak.

Allohu a’lam.