Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Silai rahmni uzish juda katta gunohlardan biridir. Rasululloh sollallohu alayhi vasallam xabar berganlaridek, Sirot ko’prigida silai rahm o’z haqqini talab qiladi. Silai rahmni uzgan odam bu ishiga javob beradi.

Agar ota farzandlaridan yuz o’girgan bo’lsa, bu uning katta xatosi. U o’z oxiratini o’ylab, imkon qadar bu aloqani tiklashga harakat qilishi kerak. Har bir inson o’zi uchun javob beradi. Hech kim boshqaning o’rniga javob bermaydi.

Otaning tug’ilganidan beri farzandidan xabar olmasligi, na holidan xabar olishi va na ta’minotini qilishi — bu silai rahmni uzishning juda og’ir ko’rinishlaridan biridir.

Lekin alhamdulillah, bolalar otalari bilan aloqani uzmay, gaplashib turishayotgan bo’lsa, bu yaxshi.

Endi o’g’lingizning to’yi masalasiga kelsak, otasini albatta xabardor qilish kerak.

Agar otasi chaqirilmasa, bu safar silai rahmni bola ham uzgan bo’lib qoladi. Otaning xatosiga javoban bola ham xato qilmasligi kerak.

Balki ota o’g’lining uylanayotganini eshitib xursand bo’lar. Balki shu to’y sabab yana ota-bola orasidagi mehr tiklanar. Farzand ulg’aygan sari otasi bilan yaqinlashadigan, do’st bo’ladigan davr keladi. Balki mana shu to’y ana shu yaqinlashuvga sabab bo’lar.

Shuning uchun otani albatta to’yga aytish kerak. Keladimi yoki kelmaydimi — bu uning ixtiyori. Ammo sizlar silai rahmni uzgan bo’lib qolmanglar.

Vallohu a’lam.