Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu juda achinarli holat. Musulmon bo‘lib turib, keyinchalik dindan chiqib ketish katta musibatdir.

Aslida, shariat hukmlari to‘liq tatbiq etiladigan jamiyatda murtadlik masalasi o‘zining alohida hukmlariga ega. Fiqh kitoblarida murtad kishiga tavba taklif qilinishi, Islomga qaytishga da’vat qilinishi zikr qilingan.

Hozirgi holatda esa eng muhim vazifa — uni Islomga qaytarishga harakat qilishdir. Modomiki inson tirik ekan, tavba eshigi ochiq. Agar shu holatda vafot etsa, uning oqibati juda xavfli bo‘ladi. Shuning uchun unga nasihat qilish, haqiqatni tushuntirish va Islomga qaytishga da’vat etish lozim.

Shu maqsadda u bilan aloqani butunlay uzib yubormaslik kerak bo‘lishi mumkin. Aksincha, yaxshi muomala, hikmat va nasihat orqali uni haq yo‘lga qaytarishga urinish kerak.

Agar yordam so‘rasa, sila-rahm va da’vat maqsadida yordam berish mumkin. Lekin bu yordam uning qilayotgan ishidan rozi bo‘lish yoki murtadligini ma’qullash ma’nosini anglatmasligi kerak.

Balki unga yordam berayotganda ham, imkon topilganda Islomga qaytishi kerakligini eslatib turish, qilayotgan ishi noto‘g‘ri ekanini bildirish lozim.

Ya’ni yordam berish ham amri ma’ruf va da’vat vositasi bo‘lsin. Ba’zan yordam berish orqali qalbini yumshatish mumkin bo‘ladi, ba’zan esa ayrim narsalarni bermaslik orqali qilayotgan ishining noto‘g‘riligini his qildirsa bo‘ladi.

Muhimi, inson nima uchun yordam berayotganingizni va nima uchun ayrim hollarda yordam bermayotganingizni tushunib tursin.

Shariatda «muallafatul-qulub», ya’ni odamlarning qalbini Islomga moyil qilish tushunchasi ham mavjud. Shuning uchun qalbini Islomga qaytarish umidida yaxshi muomala qilish va yordam berishning o‘rni bor.

Vallohu a’lam.