Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Bu juda o’rinli eslatma bo’ldi. Alloh sizdan rozi bo’lsin.

Haqiqatan ham, ko’pchilik dinini erkinroq yashash, farzandlarini Islom ruhida tarbiyalash va gunohlardan uzoq bo’lish niyatida hijrat qilgan edi. Endi o’sha noto’g’ri odatlarni yana o’zimiz to’ylarimizga olib kirishimiz to’g’ri emas.

To’yda ayollar uchun nashid eshittirish masalasida ulamolar ruxsat bergan doira bor. Masalan, daf jo’rligida aytiladigan nashidlar to’y munosabati bilan joiz, degan hukmlar kelgan.

Lekin bugungi kunda ba’zan “nashid” nomi ostida shunday ohanglar qo’yiladiki, undagi musiqa, ritm va ovozlar oddiy qo’shiqdan deyarli farq qilmaydi. Tashqaridan eshitgan odam u yerda nashid emas, diskoteka bo’layotganini o’ylaydi.

Bunday bazmlarda turli raqslar, noo’rin harakatlar va Islom odobiga to’g’ri kelmaydigan holatlar sodir bo’ladi. Natijada to’y ibodat va shukr yig’ini bo’lish o’rniga, gunoh ishlarga sabab bo’lib qoladi.

Aslida bu holat shariat ruxsat bergan kichik eshikni asta-sekin kengaytirib, oxir-oqibat katta darvozaga aylantirib yuborishning natijasidir.

Shuning uchun oxiratini o’ylaydigan, taqvoni maqsad qilgan mo’mina ayollar bunday ishlardan chetda bo’lishga harakat qilishlari kerak.

Vallohu a’lam.