Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Haqiqatda, bu bugungi hayotimizda eng ko’p unutilgan va shariatga eng kam amal qilinayotgan masalalardan biridir. Bu — meros masalasi.

Afsuski, odamlar eng yaqin qarindoshlariga zulm qilishadi. Singillariga, opalariga, ba’zan hatto aka-ukalariga ham merosdagi haqqini bermaydilar. Ota vafot etsa, uyda qolgan o’g’il hamma narsani o’ziniki qilib oladi, turmushga chiqqan qizlarga esa: “Senga hech narsa yo’q”, deyiladi.

Bu esa ochiq-oydin zulmdir.

Alhamdulillah, bugungi kunda bu sunnat asta-sekin jonlanmoqda. Oxiratni o’ylaydigan inson meros masalasida Allohning hukmiga bo’ysunadi va har bir haqdorning haqqini beradi.

Agar haqdorning haqqi berilmasa, buning oqibati juda og’ir.

Rasululloh sollallohu alayhi vasallam xabar berganlaridek, Sirot ko’prigining ikki tomonida silai rahm va omonat turadi. Ular o’z haqlarini talab qiladilar.

Meros ham omonatdir. Sizning qo’lingizdagi mol aslida boshqalarning haqqi bo’lsa-yu, uni bermay yeb yursangiz, bu omonatga xiyonat hisoblanadi.

Inson bu dunyoda qancha mol yig’masin, baribir uni tashlab ketadi. Ammo har bir tiyin uchun Allohning huzurida javob beradi.

Shuning uchun aqlli inson merosni o’zlashtirib olishga emas, balki undan tezroq qutulishga, ya’ni haqdorlarning haqqini ado etishga harakat qiladi. Chunki oxiratdagi hisob-kitob bu dunyodagi foydadan ancha og’irdir.

Vallohu a’lam.