Bunday ish, asosan, lag’v (behuda mashg’ulot) hisoblanadi.

Rasululloh ﷺ: “Har qanday lag’v botildir…” deb marhamat qilganlar (bundan shar’an istisno qilingan ayrim mashg’ulotlar mustasno).

Agar rizq topmoqchi bo’lsangiz, ummatga foyda keltiradigan ish bilan shug’ullanganingiz ma’qul. Kompyuterxonada yoki PlayStation klubida yoshlar soatlab vaqtini behuda o’tkazadi. Ta’lim olishi, foydali ilm bilan mashg’ul bo’lishi o’rniga ayrimlari ota-onasidan yashirincha pul olib kelib, vaqtini shu yerda sarflaydi.

Siz uchun qancha ko’p o’tirishsa, shuncha daromad bo’ladi. Ammo bu ularning o’ziga ham, ota-onasiga ham zarar yetkazadi. Shuning uchun ummatga zarar yetkazadigan ishlarga sabab bo’lish tavsiya etilmaydi.

Bugungi kunda ko’plab xalqlar farzandlarini ilm, texnologiya va kasb-hunarga yo’naltirmoqda. Afsuski, ayrim musulmon yoshlar esa soatlab, hatto kunlab o’yinlarga berilib ketmoqda. Ba’zan buning oqibatida oilalar ham zarar ko’rmoqda. Ayrimlar turmush o’rtog’i va oilasining haqlarini unutib, butun vaqtini o’yinlarga sarflab yuboradi. Bu jiddiy muammo.

Shuning uchun bunday ishlarga hissa qo’shmaslikka harakat qiling.

Agar tijorat qilmoqchi bo’lsangiz, odamlarga manfaat yetkazadigan kasbni tanlang. Masalan, nonvoychilik, oshxona, dorixona, yuk tashish yoki insonlarning ehtiyojini qondiradigan boshqa halol kasblar bilan shug’ullaning.

Musulmonlarning vaqtini behuda o’tkazishga sabab bo’ladigan faoliyatni ochishni tavsiya qilmayman.

Vallohu a’lam.