Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu rivoyatning aslini va sahihligini bilmayman. Lekin shariatdagi aniq va sahih dalillarga qaraydigan bo‘lsak, har bir inson o‘z amali uchun javob beradi.

Jannatga kirish yoki kirmaslik Allohning hukmi bilan bo‘ladi. Biror kishi: “Men falonchi jannatga kirmaguncha jannatga kirmayman,” deb turib olib, boshqa bir insonni jannatga kiritib yuborishi haqida men biladigan sahih dalil yo‘q.

Shafoat masalasiga kelsak, shafoat Allohning izni bilan bo‘ladi. Hech kim o‘zicha shafoatchi bo‘la olmaydi. Alloh taolo kimga izn bersa, o‘sha shafoat qiladi.

Alloh taolo:

فَمَا تَنْفَعُهُمْ شَفَاعَةُ الشَّافِعِينَ

“Shafoatchilarning shafoati ularga foyda bermaydi.”

(Muddassir, 48)

degan.

Masalan, kofir yoki munofiq bo‘lgan kishiga shafoat foyda bermaydi. Gunohkor mo‘minlarga esa Alloh taolo xohlasa va izn bersa, ayrim bandalar shafoat qilishi mumkin.

Shuning uchun: “Biz bir-birimizni yaxshi ko‘ramiz, qiyomat kuni ham bir-birimizni jannatga olib kiramiz,” degan gaplarni dalil qilib olish to‘g‘ri emas.

Bundan ham xavflisi, ayrimlar shu kabi hikoyalarni bahona qilib, nomahramlar o‘rtasidagi munosabatlarni oqlashga harakat qiladilar. Go‘yoki harom yo‘llar bilan yurilgan muhabbat keyinchalik jannatga sabab bo‘lar emish. Bu noto‘g‘ri tushuncha.

Tarix davomida ba’zi kishilar ishq-muhabbat haqidagi qissalarni, Layli va Majnun kabi hikoyalarni haddan tashqari ulug‘lab, hatto ma’siyat va fujurga eshik ochib berganlar.

Yana ayrim to‘qima gaplarda:

“Kim ishqda o‘lsa, shahid bo‘ladi,”

degan da’volar ham uchraydi. Bunday gaplar sahih dalillarga asoslanmagan.

Agar ikki inson bir-birini yaxshi ko‘rsa, buning shar’iy yo‘li bor — nikoh. Ammo nomahram bo‘la turib, ishqiy suhbatlar qilish, harom munosabatlar yuritish va keyin buni: “Muhabbatimiz uchun jannatda ham birga bo‘lamiz,” deb oqlash mumkin emas.

Shaytonning hiylalaridan biri ham shu — inson qilayotgan gunohini unga chiroyli qilib ko‘rsatadi va unga turli bahonalar topib beradi.

Mo‘min inson bunday shubhalarga aldanmasligi kerak.

Alloh taolo shariatni bizga bekorga tushirmagan. U Zot nimani buyurgan bo‘lsa, unda yaxshilik bor. Nimadan qaytargan bo‘lsa, unda zarar bor.

Biz Rasululloh ﷺ ko‘rsatgan aniq yo‘lga ergashishimiz kerak. Halol aniq, harom ham aniq.

Nomahram bilan ishqiy suhbatlar, sevgi-muhabbat bahonasida harom munosabatlar yuritish joiz emas.

Shuni yaxshi tushunib olish kerakki, harom asosiga qurilgan muhabbat inson uchun shafoatchi bo‘lib qolmaydi. Najot esa Allohning rahmati va Rasululloh ﷺ ko‘rsatgan yo‘lga ergashish bilandir.

Vallohu a’lam.