Bismillah, alhamdulillah, vassalatu vassalamu ‘ala Rasulillah. Amma ba’d:

Agar bu idda uch taloq bilan ajrashgan ayolga tegishli bo‘lsa yoki eri vafot etgan ayollar bo‘lsa, hukmlar quyidagicha bo‘ladi:

Eri vafot etgan ayol to‘rt oy o‘n kun idda o’tiradi.

Uch taloq bilan ajrashgan ayol esa uch hayz ko‘rguncha (agar hayz ko‘rsa), yoki hayz ko‘rmasa – uch oy, homilador bo‘lsa – homilasini tug‘ilgunga qadar idda o’tiradi.

Idda davrida ayol kishiga quyidagilar mumkin emas:

Atr va ziynat buyumlaridan foydalanish.

Safarga chiqish.

Kechasi uydan tashqarida tunash.

Behojat uydan chiqish.

Agar zarurat bo‘lsa, masalan, shifokorga borish, bozorga chiqish, yoki boshqa muhim ehtiyojlar uchun uydan chiqish joiz bo‘ladi. Shuningdek:

Agar ayol uyda siqilib qolsa, toza havo olish uchun kunduzi tashqariga chiqib aylanishi mumkin.

Ishlab tirikchilik qilayotgan bo‘lsa, ishga borib kelishiga ham ruxsat etiladi.

Biroq, sayohat qilish, shunchaki aylanish yoki boshqa joylarga borib qolish mumkin emas. Iddadagi ayol ehtiyotsizlik bilan ko‘chaga chiqmaydi.

Kechasi uydan tashqarida qolmaydi va ziynat buyumlaridan foydalanmaydi. Eri vafot etgan ayollar to‘rt oy o‘n kun, uch taloq bilan ajrashgan ayollar esa uch hayz (yoki hayz ko‘rmaydigan bo‘lsa – uch oy, homilador bo‘lsa – tug‘ilguncha) idda o’tiradi. Bu davrda yuqoridagi shariat hukmlariga rioya qilinishi lozim.

Vallohu a’lam.