Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu holatga aniq bir hukm berish qiyin. Masalaga eringizning holati, sharoiti va imkoniyatlariga qarab baho beriladi.

Aslida ayol kishi eri bilan birga yuradi: safarda ham, eri yashayotgan joyda ham birga bo‘lishi kerak — bu asl qoidadir. Lekin agar bundan jiddiy zarar kelishi aniq bo‘lsa, ya’ni ayol zulm ko‘rsa, sog‘lig‘iga yoki bolalariga real zarar yetishi ehtimoli bo‘lsa, u holda لَا ضَرَرَ وَلَا ضِرَارَ — zarar yetkazish ham, zararga zarar bilan javob berish ham yo‘q — qoidasiga amal qilinadi. Bunday vaziyatda kattalar aralashib, maslahat bilan masala hal qilinadi.

Men bu yerda turib: “Eringizga bo‘ysunmang, bormang”, deb ayta olmayman. Chunki bunday hukm holatni to‘liq bilmasdan berilmaydi. Shu bilan birga, eringizga nasihat shuki: oilani asrash, xotinini va bolalarini himoyalash erkakning burchidir. Xotini homilador bo‘la turib, uni noloyiq yoki og‘ir sharoitlarga olib borish, davolanishi qiyin joyda qoldirish to‘g‘ri emas.

Odatda har bir erkak oilasini asrashni o‘ylaydi. Shuning uchun bu masalada sizning ota-onangiz, aka-ukalaringiz yoki qaynota-qaynonalar ishtirokida o‘tirib, maslahat bilan, kelishib ish tutish eng to‘g‘ri yo‘ldir.

Vallohu a‘lam.