Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Albatta, doim ruqiya o’qib yurishingiz to’g’ri. Shar’iy ruqiyalarni o’qib yurishning hech qanday zarari yo’q. Inson o’ziga Qur’on oyatlari va duolar bilan panoh so’rab yurgan bo’ladi. Buni qancha ko’p o’qisa ham, hech qanday ziyoni yo’q.

Bu holat nazardan ham bo’lishi mumkin, jin ta’siridan ham bo’lishi mumkin yoki sog’lig’ingiz bilan bog’liq tibbiy sabab ham bo’lishi mumkin.

Shuning uchun yana bir bor shifokorlarga murojaat qilib, yaxshilab tekshirtirib ko’ring. Ba’zilar aytishadiki, vitamin yetishmasligidan ham shunday holsizlik, nafas qisishi yoki bo’g’ilgandek bo’lish holatlari kuzatiladi. Balki sabab shunda bo’lishi mumkin.

Har xil sabablar bo’lishi ehtimoldan xoli emas. Nima bo’lganda ham, sabablarni qilish kerak.

Ham tibbiy tomondan tekshirtirib ko’rish kerak — bu sabablarni ushlashdir. Shu bilan birga, ruqiya o’qib, duo qilib yurishingizni ham davom ettiring.

Buning hech qanday zarari yo’q.

Alloh taolodan sog’lik va shifo so’rang. Sabablarni qiling, umidingizni uzmang. Alloh taolo O’zi shifo bersin.

Allohumma omin.