Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Agar sizning vazifangiz o‘rtakashlik, vositachilik yoki ishchi topib berish bo‘lsa va firma sizga odam topib berganingiz uchun xizmat haqi to‘layotgan bo‘lsa, bu joizdir. Chunki bu o‘zaro kelishuv asosida berilayotgan haq hisoblanadi.

Bunda eng muhim shartlar:

• Hech kimning haqqi yeyilmasligi;
• Aldov va yashirish bo‘lmasligi;
• Ishchilar haqiqiy shartlarni bilishlari;
• Hech kimga zulm qilinmasligi.

Masalan, firma bilan kelishuvga ko‘ra, siz ishchi topib berganingiz uchun alohida haq olsangiz va ishchilarning maoshi bundan kamaymasa, bunda muammo yo‘q.

Lekin agar ishchining maoshi aslida 50 000 rubl bo‘lsa-da, unga 45 000 berilib, qolgan 5 000 rubl yashirin ravishda sizga berilsa, bu muammoli holatdir. Chunki keyinchalik ishchi bundan xabar topsa, norozi bo‘lishi mumkin.

U:

“Mening maoshimdan nega har oy ushlab qolinmoqda? Bir marta vositachilik qilgan bo‘lsa, nega doimiy ravishda mening hisobimdan pul olinadi?”,

deb haqli ravishda e’tiroz bildirishi mumkin.

Shuning uchun kelajakdagi norozilik va haqqi-huquq masalalarining oldini olish kerak. Agar firma sizga alohida xizmat haqi to‘layotgan bo‘lsa va bu ishchilarning maoshidan ushlab qolinmayotgan bo‘lsa, bunda zarar yo‘q.

Xulosa:

• Ishchi topib berganingiz uchun firma tomonidan berilgan xizmat haqi joiz.
• Ishchilarning maoshi to‘liq berilishi kerak.
• Aldov, yashirish va birovning haqqini yeyish joiz emas.
• Kelajakdagi noroziliklarning oldini olish uchun shaffoflik bo‘lishi kerak.

Vallohu a’lam.