Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Endi biz o‘zimizni rabboniy olim deb ayta olmaymiz. Biz ilm talabalarimiz, shu yo‘lda yurgan tolibi ilmlarmiz. Farzandning yaxshi olim, shariatga xizmat qiladigan rabboniy inson bo‘lib yetishishi uchun, avvalo, Allohdan so‘rash kerak.

Ilmni ham, fahmni ham Alloh beradi. Agar Alloh taolo insonning qalbini ochsa, u qisqa vaqt ichida ko‘p narsalarni tushunadi, o‘rganadi va o‘zlashtiradi. Shuning uchun birinchi vazifa — ota-onaning samimiy duosi.

Farzandingiz haqqiga duo qiling: «Allohim, farzandimni diningga xizmat qiladigan solih va olim insonlardan qilgin», deb.

Farzand tarbiyasi haqida biz alohida darslar qilganmiz. Unda:

• Jismoniy tarbiya,
• Aqliy tarbiya,
• Ruhiy tarbiya,
• Shaxsiyatni shakllantirish,
• Jinsiy tarbiya,

kabi mavzular batafsil bayon qilingan. Shu darslarni eshitishingizni tavsiya qilaman.

Alloh taolo Oli Imron surasida Imronning ayoli haqida hikoya qiladi. U hali tug‘ilmagan farzandini Baytul-Maqdis xizmatiga bag‘ishlab nazr qilgan edi. Alloh uning ixlosini qabul qildi va qizi Maryam onamizni go‘zal tarbiya bilan voyaga yetkazdi.

Alloh taolo aytadi:

«فَتَقَبَّلَهَا رَبُّهَا بِقَبُولٍ حَسَنٍ»

“Bas, Parvardigori uni go‘zal qabul bilan qabul qildi.”

Maryam onamiz Zakariyo alayhissalomning tarbiyalarida ulg‘aydi. Alloh unga maxsus fazl va rizqlar ato etdi. Bu bizga shuni ko‘rsatadiki, ilm ham, hikmat ham, fahm ham Allohning rizqidir.

Agar siz bugundan boshlab farzandingizni Alloh yo‘lida xizmat qiladigan inson bo‘lsin deb niyat qilsangiz va bu niyatda sobit bo‘lsangiz, Alloh taolo bunga ulkan barakalar berishi mumkin.

Farzandni qanday tarbiyalash, qachon Qur’on yodlatish, nimalarga e’tibor berish kabi masalalar esa keng mavzu. Shuning uchun farzand tarbiyasi haqidagi darslarni tinglashingizni tavsiya qilaman. U yerda bolaning aqliy, ruhiy va jismoniy rivojlanishi, shuningdek, shaxsiyatini shakllantirish yo‘llari batafsil tushuntirilgan.

Vallohu a’lam.