Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Biologik onasi nima bo‘lgan taqdirda ham uning onasi hisoblanadi. Agar imkoniyati bo‘lsa, uni topishga harakat qilsin va onalik haqqini ado etsin. Chunki onalik haqqi hech qachon uzilmaydi. Hatto ona kofir bo‘lsa ham, uning haqqi saqlanib qoladi.

Balki u ayol qilgan ishidan pushaymondir. Balki yillar davomida iztirobda yashayotgandir. Inson adashadi, xato qiladi, keyin tavba qiladi. Ehtimol, qizining oldiga borishga ham uyalayotgandir.

Shuning uchun imkon topilsa, biologik onasini topib, u bilan aloqani tiklash va o‘rtani isloh qilish yaxshi bo‘ladi.

Lekin bu, qizni voyaga yetkazgan oilaning haqqini unutish degani emas. Ularning ham qiz ustida ulkan ehsoni va fazli bor. Ular uni tarbiya qildi, voyaga yetkazdi. Shuning uchun ularga ham yaxshilik qilish va minnatdor bo‘lish lozim.

Demak, bu yerda birining haqqini ado etib, ikkinchisinikini tark qilish kerak emas. Har ikkisining haqqi o‘z o‘rnida bor:

• biologik onaning — onalik haqqi;
• asrab olgan oilaning esa — ehson va tarbiya haqqi.

Shu bois biologik onasini topishga harakat qilsin, qarindoshlik rishtalarini bog‘lasin va har ikki tomonning haqqini ado etishga intilsin.

Vallohu a’lam.