Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Avvalo, 3 yoki 4 nafar farzandli bo‘lish “ko‘p bola” hisoblanmaydi. Oldinlar bunday holatga “endi boshlagan” deyishardi — onalarimiz 8–10 nafargacha bola ko‘rgan. Shuning uchun bu holatda “bolam ko‘payib ketdi” deb o‘ylash noto‘g‘ri.

Savolga kelsak: ilm olish afzalmi, farzandli bo‘lishmi? — bu ikkalasini qarama-qarshi qo‘yish shart emas. Agar ayolning sog‘ligi ruxsat bersa, ilmni ham, farzandni ham birga olib borish mumkin. Ko‘plab ayollar bor — bola tug‘adi, emizadi, tarbiya qiladi, va bir vaqtning o‘zida ilm ham oladi. Bu mumkin va Alloh yordam beradi.

Farzandlar — ummatning ko‘payishi va baraka sababidir. Rasululloh ﷺ:

“Men boshqa ummatlarga nisbatan sizlarning ko‘pligingiz bilan faxrlanaman,” deganlar.

Shuning uchun, agar sog‘lig‘i ruxsat etsa, yana farzandli bo‘lish ham, ilm olish ham birga boraversin. Ikkalasi ham savobli, kerakli va bir-birini to‘ldiruvchi amallardir.

Vallāhu a‘lam.