Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bunday vaziyatda biz: “Buni qiling, shuni qiling” deb aniq bir chorani ayta olmaymiz. Sabr qilish tavsiya etiladi. In shaa Alloh, vaqt o‘tishi bilan bu holatlar asta-sekin yaxshilanib boradi.

Bizning jamiyatimizda odatda kelinlar boshida biroz qiyinchilik ko‘rishadi. Keyinchalik esa, hayot o‘z yo‘liga tushib, bolalar ko‘payib, oila mustahkamlangani sari ayolning mavqei ham asta-sekin mustahkamlanadi.

Bolalar ulg‘ayib, o‘z onalarini himoya qila boshlashadi. Shunday holatlar bo‘ladiki, vaqt o‘tib oiladagi muvozanat ayol tomoniga og‘ib boradi. Bu ko‘p uchraydigan holat.

Shu sababli bunday vaziyatda sabr qilishdan boshqa aniq tavsiya berish qiyin.

Alloh taolo insof bersin, O‘zi bu holatni isloh qilsin. Agar imkon bo‘lsa, rahm-shafqatni uzmaslik haqidagi nasihat va ma’ruzalarni eringizga, oilangizga, hatto qaynonangizga ham eshittirishga harakat qiling.

Ota-onaga oyda bir marta borishni ham minnat bilan ruxsat berish — ayolning haqiga zulm hisoblanadi. Ammo shunga qaramay, hech kim sizga: “Bo‘ldi, ketavering, ajrashing” demaydi.

Bunday paytda sabr qilish eng to‘g‘ri yo‘l bo‘ladi. In shaa Alloh, Alloh taolo O‘zi bir yo‘l ochib beradi.

Vallohu a‘lam.