Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Siz: «Asosiy vaqtimni uyda o‘tkazaman», deb aytdingiz. Menimcha, muammoning bir qismi shu yerda bo‘lishi mumkin.

Erkak kishi doim uyda bo‘lib qolsa, xotini oldidagi haybati va qadri kamayishi mumkin. Shuning uchun ertalab chiqib, kuningizni ilm bilan, dars bilan yoki foydali mashg‘ulot bilan boshqa joyda o‘tkazing.

Agar ilm tolibi bo‘lsangiz, darslaringizni masjidda yoki boshqa ilm majlislarida davom ettiring. Kechqurun esa xuddi ishdan qaytayotgan odam kabi uyga qayting. Shunda xotiningiz ham sizni sog‘inadi.

Chunki har doim bir-biringizni ko‘rib yuraversangiz, vaqt o‘tishi bilan zerikish paydo bo‘lishi mumkin. Bu esa oiladagi muhabbatga salbiy ta’sir qiladi.

Shu maslahatni bir muddat amalga oshirib ko‘ring. Keyin ham muammo davom etsa, yana maslahat so‘rashingiz mumkin. Balki bunga ehtiyoj ham qolmas.

Vallohu a’lam.