Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Endi bu ixtilofli masala. Agar so‘mga so‘m olsangiz ham, ba’zi kishilar: “Bo‘ladi, chunki qadri shu”, deydi. Masalan, hisobdagi 100 millionning naqd qiymati 95 million bo‘lishi mumkin. Ba’zi joylarda esa 100 ga 100 bo‘ladi.

Buni o‘zimizning tilda “obnal” deyiladi. Agar almashtirilayotgan narsalarning qiymati shunga to‘g‘ri kelayotgan bo‘lsa, xuddi bitta 100 dollarlikni ikkita 50 dollarlikka almashtirgandek bo‘ladi. “Men ikkita pul beryapman-ku”, deyilmaydi. Chunki ikkita 50 dollarlikning qiymati bitta 100 dollarlikning qiymatiga teng.

Shunga o‘xshab, agar hisobdagi 100 million so‘mning bozor qiymati naqd 95 million so‘mga teng bo‘layotgan bo‘lsa, ba’zilar: “So‘mga so‘m olsa ham bo‘ladi”, deydi.

Endi bu ixtilofdan chiqish uchun 95 million so‘mning o‘rniga shu qiymatdagi dollar berilsa, pulning jinsi o‘zgaradi. Shunda xilofdan chiqish osonroq bo‘ladi, deyishadi.

Haqiqatan ham, agar bozor qiymatida hisobdagi 100 million so‘mning naqd qiymati 95 yoki 98 million so‘m bo‘lsa, ba’zi ulamolar buni pulni pulga teng bo‘lmagan holda almashtirish deb hisoblamaydilar. Chunki hisobdagi pul bilan naqd pulning o‘rtasida farq bor.

Lekin buni joiz emas, deganlarning gapini ham inobatga olib, xilofdan chiqish uchun dollarga almashtirib olish mumkin. Bunda pulning jinsi boshqa bo‘lgani uchun muammo kamroq bo‘ladi.

Vallohu a’lam.