Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin

Tunda ishlash shar’an harom emas. Biroq afzali — kechasi uxlab, kunduzi ishlashdir.

Chunki Alloh taolo kechani dam olish va uyqu uchun, kunduzni esa tirikchilik qilish uchun yaratganini Qur’onda bayon qilgan.

Bugungi kunda tibbiyot mutaxassislari ham kechasi uxlashning inson salomatligi uchun juda foydali ekanini ta’kidlamoqdalar. Ayniqsa, xufton namozidan keyin erta uxlash organizmda sog’liq va quvvat uchun foydali bo’lgan ayrim gormonlarning ajralishiga yordam beradi.

Shuningdek, uzoq vaqt davomida tungi uyqudan mahrum bo’lish ayrim kasalliklar, doimiy charchoq va gormonal muvozanatning buzilishiga sabab bo’lishi mumkinligi ham aytiladi.

Lekin bu, kechasi ishlash harom yoki gunoh degani emas.

Agar tirikchilik, kasb yoki boshqa zarurat sababli inson tungi smenada ishlashga majbur bo’lsa, buning shar’an hech qanday man qilinadigan tomoni yo’q. Chunki hamma ham kunduzgi ish topa olmaydi. Ba’zan inson oilasini boqish uchun tungi smenada ishlashiga to’g’ri keladi.

Shuning uchun, agar zarurat bo’lsa, tunda ishlab, kunduzi dam olishingiz joiz.

Ammo imkon topilganida, kechasi uxlab, kunduzi ishlash afzalroq va insonning tabiiy hayot tarziga ham ko’proq mos keladi.

Vallohu a’lam.