Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masalada avvalo peshin vaqti qanday kirishini tushunib olish kerak. Quyosh sharqdan chiqib, g‘arbga botadi. Quyosh ko‘tarilib borar ekan, narsalarning soyasi asta-sekin qisqarib boradi. Soya qisqarib borib, eng qisqa nuqtasiga yetadi va bir oz muddat to‘xtagandek bo‘ladi. Bu holat qiyom deyiladi.

Shundan keyin quyosh og‘ishni boshlaydi va soya yana uzaya boshlaydi. Ana shu soya qayta uzaya boshlagan payt — peshin vaqti kirgan payt bo‘ladi. Ya’ni qiyom vaqti o‘tib, zavol boshlanganda peshin vaqti kiradi.

Agar yerga qarab soyani kuzatsangiz, masalan bir joyni belgilab, soyani chizib borsangiz, avval qisqarib boradi, keyin to‘xtaydi, so‘ng yana uzayishni boshlaydi. Ana shu uzayishni boshlagan joy — peshin vaqti kirgan joydir.

Shuning uchun peshin vaqti kirmasdan oldin namoz o‘qish joiz emas. Alloh taolo aytadi

إِنَّ الصَّلَاةَ كَانَتْ عَلَى الْمُؤْمِنِينَ كِتَابًا مَوْقُوتًا

Namoz mo‘minlarga vaqt bilan farz qilingan

Demak, 12:30 da hali vaqt kirmagan bo‘lsa, u paytda o‘qilgan peshin namozi sahih bo‘lmaydi.

Yechim sifatida shuni qilsa bo‘ladi, farzandingiz tahoratni oldindan qilib tayyor tursin. Peshin vaqti kirishi bilan darhol farz namozini tez o‘qib, keyin maktabga chiqsin. Sunnatlarni keyinroq, asrdan keyin yoki boshqa vaqtda o‘qishi mumkin.

Bu masalaga e’tiborli bo‘lish kerak, chunki vaqt chiqib ketgandan keyin o‘qilgan namoz qazo bo‘ladi, vaqt kirmasdan oldin o‘qilgan namoz esa umuman hisobga o‘tmaydi.

Shu yo‘l bilan amal qilsangiz, insha Alloh farzandingiz ham namozni vaqtida ado etadi, ham maktabga ulguradi.

Vallohu a’lam