Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu holatni men ko‘p eshitganman va ko‘rganman. Ba’zida odamda “o‘limdan qo‘rqish kasalligi” paydo bo‘ladi. Masalan, qorong‘ilikdan, yolg‘izlikdan qo‘rqib, xuddi jon chiqayotgandek tasavvur qiladi: “Mana, hozir o‘laman” degan o‘y kelaveradi.

Bu holatni faqatgina to‘g‘ri ilm va iymon bilan yengish mumkin. Allohga bog‘lanish, oxiratni eslash kerak. Bilinki, sizning umringiz Alloh tomonidan belgilangan. Belgilangan muddat tugamaguncha, hech kim sizni o‘ldira olmaydi va siz ham o‘lmaysiz.

Shunday ekan, qo‘rquv o‘rniga xotirjam bo‘ling. O‘lim kunduzi ham, kechasi ham kelishi mumkin. Insonning ajali bitgan bo‘lsa, u qayerda bo‘lishidan qat’i nazar, jonini topshiradi.

Bu narsa aslida ko‘proq ruhiy (psixologik) muammo. Ba’zida jin va shaytonlarning ham vasvasasi bo‘lishi mumkin. Lekin ikkala holatda ham to‘g‘ri ilm va qadar haqidagi iymon bu narsani yengadi, inshaAlloh.

Shuning uchun siz qadarga iymonni mustahkam tuting, Qur’on o‘qing, Allohga bog‘laning. Allohning Ismi-Sifatlarini o‘rganing. Bu darslar iymonni kuchaytiradi va qalbga sakinat beradi.

Ba’zi kishilarni eshitganman: “Allohni shunchalik yaxshi ko‘rib qoldimki, o‘lim men uchun orzu bo‘lib qolgandi. Chunki o‘lsam Allohning huzuriga boraman, gunohlarimni ham U kechiradi degan umidim bor”, deb aytishgan.

Shunday bo‘lsa ham, ba’zi odamlar vasvasa sabab: “Ana o‘lyapman, ana jonim chiqyapti”, deb namozni ham tark etib qo‘yadi. Lekin u aslida o‘lmaydi, faqatgina o‘zini qiynaydi. Bu vasvasa.

Uni ketkazadigan narsa — to‘g‘ri ilm, qadar haqiga iymon va Allohni tanish. Shunda barchasi joy-joyiga tushadi.

Vallohu a‘lam.