Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Alloh taolo akangizga to‘g‘ri yo‘lni topish uchun hidoyat, tavfiq va qalb hushyorligi bersin. Siz aytayotgan muammo — og‘ir, ammo afsuski, bugungi kunda juda ko‘p uchrayapti.

Qimor — Alloh taolo Qur’onda ochiq-oydin harom qilgan narsalardan biridir:

يَـٰٓأَيُّهَا ٱلَّذِينَ ءَامَنُوٓا۟ إِنَّمَا ٱلْخَمْرُ وَٱلْمَيْسِرُ وَٱلْأَنصَابُ وَٱلْأَزْلَـٰمُ رِجْسٌۭ مِّنْ عَمَلِ ٱلشَّيْطَـٰنِ فَٱجْتَنِبُوهُ لَعَلَّكُمْ تُفْلِحُونَ ٩٠

Ey, iymon keltirganlar! Albatta, xamr, qimor, butlar va (fol ochadigan) cho`plar iflosdir. Shaytonning ishidir. Bas, undan chetda bo`ling. Shoyadki, najot topsangiz. (Maida: 90)

Qimor bu — nafaqat gunoh, balki moliyaviy halokat va ijtimoiy inqiroz manbaidir.
Kimdir: “Bir kun bo‘lsa ham yutib qolarman,” deb o‘ylaydi. Ammo bu — shaytonning tuzog‘i. Hatto yutib qolgan taqdirda ham bu pul halol bo‘lmaydi. Chunki u — boshqaning haqqini nohaq olishdir, u pulda baraka bo‘lmaydi, qalbga ham, ro‘zg‘orga ham falokat olib keladi.

Duo:
Alloh akangizga hidoyat bersin, gunohdan najot topsin. Qalbini uyg‘otsin, rizqini haloldan qilsin. O‘zining rahmati bilan uni gunoh yo‘lidan qaytarib, to‘g‘ri yo‘lga boshlasin.
Allohumma āmīn.

Vallāhu A‘lam.