Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Vallohu a‘lam, bu holat siz pul bergan vaqtdagi niyatingizga bog‘liq. Agar siz bu mablag‘ni farzandingizga ta’lim-tarbiya berayotgan o‘qituvchilarning xizmatiga, ya’ni umumiy rag‘bat va qadrlash maqsadida berayotgan bo‘lsangiz — bunda xato yo‘q.

Chunki bu yig‘ilgan pul faqat 8-mart yoki tug‘ilgan kunlar uchungina emas, balki boshqa holatlar — taqdirlash, mehnatni qadrlash va yaxshi munosabat evaziga ham bo‘lishi mumkin. Shunday ekan, siz bu pullarni “farzandimga tarbiya berganlari uchun xizmat haqqi sifatida” deb niyat qilgan holda bersangiz, bu joiz bo‘ladi.

O‘qituvchi bu pullarni keyin nimaga ishlatadi — bu uning javobgarligi. Siz xizmatiga bergan bo‘lasiz, u kishi esa shaxsiy xohishiga ko‘ra sarf qiladi. Masalan, bir odam sizning uyda ish qiladi va siz unga pul to‘laysiz. U kishi o‘sha pulni nos yoki aroqqa ishlatsa — siz emas, u javobgar bo‘ladi.

 Vallohu a‘lam.