Bismillahir rohmanir rohiym. Alhamdulillah, vassolatu vassalamu ‘ala Rasulillah, amma ba’d.

Avvalo, Bitcoin va boshqa kriptovalyutalarning savdosi borasida biz bir necha marta aytganmiz: bu ishga kirishmanglar, bu — joiz emas deb.

Mana shu holat bunga yaqqol misol bo‘la oladi. 200 ming dollar zarar — bu o‘z-o‘zidan emas. Bu sohada, xuddi qimordek, avval yutishlar, so‘ng butkul yo‘qotishlar bo‘ladi. Pulni yig‘ib-yig‘ib, ko‘zga ko‘rinmaydigan, noma’lum kuchlar uni xuddi baliqni to‘rdan olganday yig‘ib ketmoqda. Bu yerda ishtirok etayotgan musulmonlar va halol topishni istagan sodda odamlar oxirida aynan shunday zarar ko‘rmoqda.

Bu ishda qatnashmaslik eng to‘g‘ri yo‘ldir. Musulmon kishi molini, vaqtini va qalbini bunday mavhum va xavfli narsalarga tikmasligi lozim. Bu iqtisodiy jihatdan ham, shariat nuqtayi nazaridan ham ishonchli emas.

Endi esa siz aytgan holatga keladigan bo‘lsak: agar sheriklaringiz boshida sizga ochiq aytgan bo‘lsa — “Agar zarar bo‘lsa, sen mehnatingga kuyasan, biz esa pulimizga,” — deb, bu kelishuv asosida ishlagan bo‘lsangiz, shariatda shartlar muhim ahamiyatga ega.

Umar ibn Xattob roziyallohu anhu aytganlar:
“Al-huququ inda ash-shurut.” Ya’ni: “Haqlar shartga qarab belgilanadi.”

Agar shunday kelishuv bo‘lgan bo‘lsa, bu holatda siz o‘z vaqtingiz, mehnatingiz bilan zarar ko‘rgansiz, ular esa pul bilan. Endi orqaga qaytib, kelishuvni o‘zgartirish to‘g‘ri emas. Bu har ikki tomonning o‘z va’dasiga va shartlariga sodiq qolishini talab qiladi.

Nasihat:
Pul topish yo‘llari ko‘p, lekin har biri shariat mezonidan o‘tishi kerak. Yaxshi niyat bilan bo‘lsa ham, noto‘g‘ri yo‘ldan topilgan daromad baraka keltirmaydi. Tavakkul va halollik bilan harakat qiling. Tez boyish ilinjida har qanday riskli va shubhali ishga kirishmang. Alloh Subhanahu va Ta’ala bandalarini sinaydi — mol bilan, vaqt bilan, imkon bilan. Sinovda sobit qolganlarga Allohning yordami yaqin bo‘ladi.

Vallohu a’lam.