Bismillah, alhamdulilloh, vassalatu vassa’lam ‘ala rasulillahi, amma ba’d.

Bu ish shariat hukmiga ko‘ra harom hisoblanadi. Chunki birovning mulkiga ruxsatsiz kirib, uni tintuv qilish – bu huquqbuzarlikdir. Sizning xonangiz – sizning shaxsiy mulkingiz hisoblanadi. U yerga ruxsatsiz kirish va narsalarni tekshirish shar’an harom bo‘lib, bu katta hurmatsizlik va tajovuz sanaladi. Hatto bu holatni “qaynonaning ochko‘zligi va uyatsizligi” deyish ham joiz bo‘ladi, garchi bu ifoda qo‘pol tuyulsa ham.

Afsuski, bizda ba’zi qaynonalar bu kabi harakatlarni o‘zlariga halol deb hisoblaydi. Go‘yoki: “Men farzandimning onasiman, demak bu uyda meniki ham bor”, degan noto‘g‘ri tushuncha bilan ish tutadilar. Ammo bu noto‘g‘ri. Kelinning o‘zi kim? U sizning farzandingizga turmushga chiqqan ayol – sizning qulingiz emas.

Bilganingizni qilish, istagancha tergash, masalan, kelinning telefonini tintuv qilish, shaxsiy joylarini ko‘zdan kechirish – bularning barchasi musulmon odamning obro‘sini toptashga kiradi. Bu esa uni xafa qilishdir. Yana eslatib o‘tamiz: bir mo‘minni xafa qilish – Ka’bani buzib tashlashdan ham yomonroqdir.

Rasululloh (sallallohu ‘alayhi va sallam) aytganlar: “Ka’baning Alloh huzuridagi hurmati naqadar ulug‘ bo‘lsa, bir mo‘minning hurmati undan ham ulug‘dir” – deb Ka’baga qarab aytganlar. Endi, o‘sha kelingiz mo‘mina ayol emasmi? Uning obro‘sini toptash, qalbini ranjitish, ko‘z yoshini oqizish halolmi?

Albatta bu harom. Alloh bunday ishlarni isloh qilsin. Qaynonalarga Alloh insof bersin.

Ayrim hollarda esa, qaynonalar er-xotin yotgan joyga ham bostirib kirib boradi. Bu darajada pastkashlik va uyatsizlik bo‘lishi mumkinmi? O‘g‘liga esa: “Eshikni qulflamang, ochiq tursin”, degan bahonalar bilan rashk tufayli shunday aqlsizliklarga borayotgan ayollarni ham eshitamiz. Bu esa nihoyatda uyatsiz holatdir.

Alloh hammamizni isloh qilsin. Bunday ishlar mutlaqo mumkin emas.

Wallohu a’lam.