Bismillah,

Alloh taologa hamdlar, undan keyin payg‘ambar kelmaydigan oxirgi payg‘ambar, uning oilasi, sahobalari va qiyomatgacha ularga yaxshilik bilan ergashganlarga salovot va salomlar bo’lsin.

Bu masalaga o‘sha darsda tafsilotli tarzda to‘xtalganmiz — xohlasangiz, darsni yana bir bor eshitib chiqing. Biroq qisqacha tushuntiradigan bo‘lsak,

Qur’onda “ahlul kitob” (yahudiy va nasroniylar)ning “taomi sizlarga halol qilindi” (Moida surasi, 5-oyat) deb aytiladi.

Tafsir ulamolari bu yerda “taom”dan maqsad ular so‘ygan hayvon go‘shti ekanini bayon qilganlar.

Lekin bu halollik ba’zi shartlar bilan bog‘langan:

1. So‘yuvchi – musulmon yoki haqiqiy ahli kitob bo‘lishi kerak.

2. So‘yish usuli – shar’iy bo‘lishi shart, ya’ni hayvon tomirlaridan qon chiqarib, bo‘g‘izlab so‘yilishi kerak.

   • Boshiga bolta urib o‘ldirish, elektr toki bilan urib nobud qilish yoki bo‘g‘ib o‘ldirish — halol emas. Bu usulni musulmon qilsa ham, harom bo‘ladi.

Agar yahudiy yoki nasroniy kishi Allohdan boshqasining nomi bilan so‘ysa, yoki so‘yish shar’iy bo‘lmasa — bunday go‘sht halol emas.
Ammo ular to‘g‘ri usulda, ya’ni bo‘g‘izlab, Alloh nomi bilan so‘ysa, Qur’on oyatiga binoan bu go‘sht biz uchun haloldir.

Xuddi shu kabi, ahli kitob ayollariga uylanishga ham izn berilgan. Lekin bu ham shartlar bilan: ayol ahlul kitob bo‘lishi, fohisha bo‘lmasligi, pokiza va iffatli bo‘lishi kerak. Aks holda, uylanish joiz bo‘lmaydi.

Shuning uchun, ahli kitob go‘shtini yeyish yoki ularning ayoliga uylanishda faqatgina “kitobiy” deb nom bilan emas, shar’iy shartlar bajarilganmi-yo‘qmi, shuni tekshirish zarur.

Vallohu a‘lam.