Bismillah, alhamdulillah, va salli…

Endi bu ayolni yashirincha olib uylanish kerak deb maslahat bera olmaymiz. Chunki hozir uning ota-onasi va qarindoshlari hali ham uni turmush o‘rtog‘i bilan yashayapti, deb o‘ylashmoqda.

Agar bu ayol eridan ajrashgan bo‘lsa-yu, siz bilan yashab yursa, keyin boshqa joyda eri borligi ma’lum bo‘lib qolsa, bu juda g‘alati holat bo‘ladi. Odamlar “Bu nima bo‘ldi?” deb ajablanishadi.

Keyin siz bilan bo‘ladigan turmushi qanday kechadi — bunga hech kim kafolat bera olmaydi. Sizning ota-onangiz uni kelin sifatida qabul qiladimi? Yashirincha olib kelsangiz, ular “Ota-onasi qani, bu kim?” deb so‘rashadi. O‘zbekchilikda bu kabi masalalarga qattiq qaraladi. Kelin hurmat topmaydi, shubha ostida qoladi. “Bu kimdan qolgan? Eri qayerda?” degan gaplar aylanadi.

Keyin siz ham, ehtimol, uni xotin sifatida qabul qila olmasangiz, ayol yana ruhiy jarohat oladi. Shuning uchun mening nasihatim: har bir narsa ochiq-oydin bo‘lishi kerak.

Ya’ni bu ishni yashirin tutmaslik kerak. Siz ham, u ayol ham kurashinglar. Ayol ota-onasiga ochiq aytsin: “Men erimdan ajrashdim. Sababi mana bu, mana bu edi.” Ajrashgan bo‘lsa ham, baribir ota-onasi uni turmushga bermoqchi bo‘ladi. Aytaylik, sizdek halol, hali uylanmagan yigit chiqqan bo‘lsa, nega bermasinlar?

Shoshqaloqlikka yo‘l qo‘ymanglar. Ko‘p yoshlarni ko‘ryapmiz: “Otamga aytolmayman, onam bilmasin, o‘ldiradi meni” deyishadi-da, yashirincha turmush qurib, bir hafta, bir oy ichida ajrashib ketishadi. Erkaklar qadrlamay qo‘yadi.

Qizlar, ayollar shunday holatlarda ko‘p zarar ko‘rib qolishadi, erkaklarning shirin so‘zlariga aldanishadi. Shuning uchun izzat, obro‘ va shariatga muvofiq ish tutinglar: har narsa ochiq-oydin bo‘lsin, valiylarning roziligi bilan to‘y qilib, halol yo‘l bilan nikoh tutinglar.

Men mana shuni nasihat beraman.

Allohu a’lam.