Bismillahir rohmanir rohiym. Vassalatu vassalamu ‘ala Rasulillah.

Alloh taolo sizni ham, bizni ham muvaffaq kishilardan qilsin. Toat-ibodatlarimizni, amallarimizni qabul qilib, riyodan saqlasin.

“Yoshim 27 da”, deyapsiz. Ha, bizning urfimizda bu yosh uylanish uchun kechikkan deb hisoblanadi. Arablarda esa 27 yosh hali yoshlik hisoblanadi. Ular 35 yoshgacha uylanmasa ham ajablanishmaydi. Ammo bizda 27 yosh – “endi uylansin” degan davr.

Rizq masalasiga kelsak, Alloh taolo har bir bandaning rizqini taqsimlab qo‘ygan. Sizdan tug‘iladigan farzand sizning rizqingizni kamaytirmaydi. U ham o‘z rizqi bilan keladi. Rizq kamaymaydi, aksincha baraka bo‘ladi, bu ishonch bilan bog‘liq masala.

Rasululloh sallallohu alayhi vasallam zamonida sahobalar “Cho‘rilarimiz homilador bo‘lib qolishidan qo‘rqamiz, ularni sotolmay qolamiz”, deb azl – ya’ni saqlanish haqida so‘rashgan. Shunda Rasululloh:
“Alloh taolo yaratmoqchi bo‘lgan ruh, baribir yaratiladi”, deb azlni ma’qullamaganlar.

Shunday ekan, siz ham Allohning fazlini so‘rang. Farzandni istang, uni kechiktirmaslikka harakat qiling. Alloh tishini bergan zot rizqini ham beradi, deb aytilgan. Uylangach, Alloh taolo o‘zi sizning tijoratingizga, ishlaringizga baraka beradi, yo‘l ochadi, insha Alloh.

Menimcha, farzandli bo‘lishni kechiktirish to‘g‘ri emas. Aksincha, tezroq farzand ko‘rsangiz, sizga yordamchi bo‘ladi. Xalqimizda “30 yoshga kirgan odamning o’tin teradigan o‘g‘li bo‘lsin”, deyishadi. Bu bejiz emas. Yoshingiz o‘tgan sari farzandingiz ham ulg‘ayib, sizga suyanch bo‘la boshlaydi.

Boshqa dindagi odamlarga taqlid qilmang. Ular rizqqa iymon keltirmagan. Ular bola o‘rniga kuchuk boqmoqda, mushuk boqmoqda. Keksayganda esa yolg‘iz qolib, keksalar uyiga tushmoqda.

Bizda esa farzandli bo‘lish, ko‘payish — Rasulullohning amridir, targ‘ibidir. “Ko‘payinglar, tug‘adigan ayolga uylaninglar. Tug‘maydigan chiroyli ayoldan ko‘ra tug‘adigan qora ayol afzal” deganlar.

Shuning uchun siz ham Bismillo deb niyat qiling, saqlanish bilan ovora bo‘lmasdan, Allohdan baraka so‘rab, harakat qiling.

Allohu a’lam.